एजेन्सी – भारत विश्व क्रिकेटमा वर्तमान समयको पावर हाउस टोली हो । तर आइसिसी प्रतियोगितामा भारतको प्रदर्शन अपेक्षा अनुसार भने हुन सकेको छैन । आज साँझ भारतले आइसिसी टि२० विश्वकपमा न्युजिल्यान्डसँग खेल्दै छ ।

सुपर १२ को समूह २ मा रहेको भारत र न्युजिल्यान्ड दुबैलाई सेमिफाइनल सम्भावना बलियो बनाउन आजको खेलमा जित्नै पर्ने दबाब छ । भारत पाकिस्तानसँग पहिलो खेलमा १० विकेटले पराजित भएको थियो । न्युजिल्यान्ड पाकिस्तानसँग ५ विकेटले पराजित भएको थियो । अंक विहीन दुबै टोलीलाई यो खेल गर वा मरको अवस्था छ ।

सिरिजहरुमा न्युजिल्यान्डमाथि हाबी बनेको भारतले आइसिसीको प्रतियोगितामा भने झण्डै दुई दशक देखि हराउन सकेको छैन । आइसिसी प्रतियोगिता इतिहास हेर्दा भारतमाथि न्युजिल्यान्ड लगातार हाबी हुँदै आएको छ । आइसिसी प्रतियोगितामा भारतले पछिल्लो १८ वर्षदेखि न्युजिल्यान्डमाथि जित निकाल्न सकेको छैन । पछिल्लो पटक आइसिसी एकदिवसिय विश्वकप २००३ मा भारतले न्युजिल्यान्डलाई हराएको थियो । सिरिजमा लगातार जित हात पारेपनि आइसिसी प्रतियोगितामा भारत पराजित हुँदै आएकोछ ।

पछिल्ला आइसिसीका तीनै प्रतियोगितामा न्युजिल्यान्डले भारतलाई हराएको छ । आइसिसी टेस्ट च्याम्पियनसिप फाइनल २०२१ मा भारतलाई ८ विकेटले हराउँदै न्युजिल्यान्डले उपाधि जितेको थियो । २०१९ को एकदिवसिय विश्वकप सेमिफाइनलमा भारतलाई १८ रनले हराउँदै न्युजिल्यान्डले फाइनलमा स्थान बनाएको थियो । २०१६ को टि२० विश्वकप सुपर १० मा न्युजिल्यान्डले भारतलाई ४७ रनले हराएको थियो ।

दबाबमा कमजोर प्रदर्शन भारतीय टोलीको मुख्य कमजोरी रहँदै आएको छ । एकदिवसिय विश्वकप इतिहासमा भारत र न्युजिल्यान्डबीच ९ खेल भएका छन् । जसमा भारत ३ खेलमा विजयी हुँदा ५ खेलमा पराजित भएको छ । एक खेलको नतिजा विहीन छ । टि२० विश्वकपमा दुई खेलमा दुबैमा न्युजिल्यान्ड विजयी भएको छ ।

च्याम्पियन्स ट्रफी र टेस्ट च्याम्पियनसिप दुबै फाइनलमा भेट हुँदा न्युजिल्यान्डले भारतलाई हराउँदै च्याम्पियन बनेको छ । समग्रमा भारत र न्युजिल्यान्डबीच सबै आइसिसीको प्रतियोगितामा गरि कुल १२ खेलमा प्रतिस्पर्धा गर्दा न्युजिल्यान्ड ९ खेलमा जित र ३ खेलमा पराजित भएको छ । आइसिसी प्रतियोगिता इतिहास हेर्दा भारतमाथि न्युजिल्यान्ड हाबी हुँदै आएको छ । भारत त्यो दबदबा आज तोड्न चाहन्छ । न्युजिल्यान्ड निरन्तरता दिने सोचमा छ ।

भारत यसरी समूह चरणबाटै बाहिरिन सक्छ

पाकिस्तानले अव नामिबिया र स्कटल्यान्डसँग खेल्न बाँकी छ । जसले गर्दा पाकिस्तान शतप्रतिशत जितका साथ सेमिफाइनल खेल्ने निश्चित जस्तै छ । भारत र न्युजिल्यान्डले सुरुवाती खेल हारी सकेका छन् । भारत आज पनि पराजित भएमा र बाँकी तीनै खेलमा जित निकाले पनि जम्मा ६ अंक हुनेछ । यदि यस खेलमा न्युजिल्यान्ड विजयी भएमा उसले अव अफगानिस्तान, नामिबिया र स्कटल्यान्डसँग खेल्न बाँकी छ । तुलनात्मक रुपमा न्युजिाल्यान्ड धेरै बलियो टोली हो । अप्रत्याशित हार नबेहोरे न्युजिल्यान्ड ८ अंकका साथ दोस्रो स्थानमा रहने उच्च सम्भावना छ । त्यसैले भारत आजको खेलमा पराजित भएमा ६ अंक मात्र हुँने हुँदा समूह चरणबाटै बाहिरिने उच्च सम्भावना छ ।

आइसिसी प्रतियोगितामा भारत र न्युजिल्यान्डबीचको नतिजा

भारतले पछिल्लो पटक सन् २००३ को एकदिवसिय विश्वकपमा न्युजिल्यान्डलाई ७ विकेटले हराएको थियो । त्यसपछि लगातार पराजित हुँदै आएको छ । २००० मा केन्यामा भएको आइसिसी नकआउट (च्याम्पियन्स ट्रफी) फाइनलमा भारतलाई ४ विकेटले हराउँदै न्युजिल्यान्डले आइसिसीको पहिलो उपाधि जितेको थियो ।

२०१६ को टि२० विश्वकपमा भारतीय घरेलु मैदान नागपुरमा न्युजिल्यान्ड पहिला ब्याटिङ गर्दै निर्धारित २० ओभरमा ७ विकेटको क्षतिमा १ सय २६ रन बनाएको थियो । १ सय २७ रनको विजयी लक्ष्य पछ्याउनेक्रममा भारत १८.१ ओभरमा ७९ रनमा अल आउट भएको थियो । समग्रमा भारत र न्युजिल्यान्डबीचको आइसिसी प्रतियोगिता नतिजा

विश्वकप १९७५– न्युजिल्यान्ड ४ विकेटले विजयी

विश्वकप १९७९ – न्युजिल्यान्ड ८ विकेटले विजयी

विश्वकप १९८७ – भारत १६ रन र ९ विकेटले विजयी

विश्वकप १९९२ – न्युजिल्यान्ड ४ विकेटले विजयी

विश्वकप १९९९ – न्युजिल्यान्ड ५ विकेटले विजयी

आइसिसी नकआउट (च्याम्पियन्स ट्रफी) फाइनल २००० – न्युजिल्यान्ड ४ विकेटले

विश्वकप २००३ – भारत ७ विकेटले विजयी

टि२० विश्वकप २००७ – न्युजिल्यान्ड १० रनले विजयी

टि२० विश्वकप २०१६ – न्युजिल्यान्ड ४७ रनले विजयी

विश्वकप सेमिफाइनल २०१९ – न्युजिल्यान्ड १८ रनले विजयी

टेस्ट च्याम्पियनसिप फाइनल २०२१ – न्युजिल्यान्ड ८ विकेटले विजयी

यो पनि पढ्नुहोस् : भारत र न्युजिल्यान्डबीचको खेल क्वाटरफाइनल सरह