काठमाडौं (हाम्रो खेलकुद) – आइसिसी वुमन्स टि२० विश्वकप एसिया छनोट अघि बंगलादेश भ्रमणमा रहेको नेपाली महिला टोलीले दोस्रो अभ्यास खेलमा पराजित भएको छ । बंगलादेश भ्रमणमा रहेको नेपाली महिला टोलीले दोस्रो खेलमा खराब ब्याटिङ गर्दै पराजित हुन पुगेको हो । नेपाली महिला टोलीले बंगलादेश क्रिरा शिक्षा प्रतिष्ठान (बिकेएसपि) सँग ५ विकेटले पराजित भएको छ ।

पहिलो खेलमा नेपाली महिला टोलीले बिकेएसपिलाई २४ रनले पराजित गरेको थियो । दोस्रो अभ्यास खेलमा ढाकामा टस जितेर पहिला ब्याटिङ थालेको नेपाली महिला टोली १८.३ ओभरमा ४५ रनमा अल आउट भएको थियो । नेपाली ओपनर ज्याति पाण्डेले ३१ बलमा १ चौका सहित सर्वाधिक १३ रन बनाइन् । सीता राना ५, इन्दु बर्मा ४, कविता कुँवर र रुबिना क्षेत्री बेलबासे १-१ रनमा आउट भए । रोमा थापा र कविता जोशी दुबैले खाता खोल्न सकेनन् । तल्लोक्रममा अप्सरी बेगमले २७ बलमा १३ रन बनाइन् ।

बिकेएसपिकी मरुफाले ४ ओभरमा ७ रन खर्चेर ४ विकेट लिइन् । रबियाले २, दीशा र शनु १-१ विकेट लिए । जितको लागि बिकेएसपि १२. ४ ओभरमा ५ विकेट गुमाउँदै पूरा गरेको थियो । बिकेएसपिकी सुमैयाले २० बलमा ३ चौका सहित सर्वाधिक २१ रन बनाइन् । नेपालकी कविता कुँवरले ४ ओभरमा १ मेडन सहित ६ रन खर्चेर २ विकेट लिइन् । सबनम राई र संगिता राईले १-१ विकेट लिए ।

नेपाली महिला टोली एक हप्ताको बंगलादेशमा रहनेछ । नेपाली महिला टोलीले एक बुधबार एक अभ्यास खेल खेल्नेछ । त्यसपछि नेपाली महिला टोली कतार भ्रमणमा जानेछ । नेपाली टोलीले कार्तिक ३०, मंसिर १ र २ गते (नोभेम्बर १६, १७ र १८) मा कतारसँग तीन टि२० आई सिरिज खेल्नेछ । त्यसपछि नेपाली टोली मंसिर ३ मा युएईतर्फ लाग्ने छ । एसिया छनोट मंसिर ६ देखि १२ सम्म (नोभेम्बर २२ देखि २८) सम्म हुनेछ ।

सन् २०२३ मा दक्षिण अफ्रिकामा हुने टि२० विश्वकपको लागि नेपालसहित ६ राष्ट्रले ग्लोबल छनोटको लागि युएईमा एसिया छनोट खेल्न लागेका हुन् । छनोटमा नेपाल, भुटान, हङकङ, कुवेत, मलेसिया र युएई गरि ६ राष्ट्र सहभागी छन् । नेपालले पहिलो खेल मंसिर ६ गते हङकङसँग खेल्नेछ । त्यसको भोली पल्ट मंसिर ७ गते भुटानसँग प्रतिस्पर्धा गर्ने नेपालले मंसिर ९ गते कुवेत, मंसिर १० गते मलेसिया र मंसिर १२ गते युएईसँग प्रतिस्पर्धा गर्नेछ ।

नेपाली महिला टोलीः

रुबिना क्षेत्री बेलबासे (कप्तान), सीता रानामगर, डली भट्ट, करुणा भण्डारी, इन्दु बर्मा, सरिता मगर, ज्याति पाण्डे, सरस्वती चौधरी, काजल श्रेष्ठ, सबनम राई, कविता कुँवर, अप्सरी बेगम, कविता जोशी र सङ्गीता राई ।