एजेन्सी – आइसिसी टि२० विश्वकप २०२१ को पहिलो सेमिफाइनल खेलमा न्युजिल्यान्डले इंग्ल्यान्डविरुद्ध पहिला फिल्डिङ गर्ने भएको छ । शेख जायद स्टेडियम आबूधाबीमा न्युजिल्यान्डका कप्तन केन विलियम्सनले टस जितेर पहिला फिल्डिङ गर्ने निर्णय लिएका हुन् ।

न्युजिल्ल्यान्डले आजको खेलमा टोलीमा परिवर्तन गरेको छैन । इंग्ल्यान्डले भने ओपनर जेसन रोयको स्थानमा साम बिलिंग्सलाई मौका दिएको छ । आजको खेलमा इंग्ल्यान्डको ओपनिङ जोनी बेयरस्टो र जस बटलरले गर्ने छन् ।

ओईन मोर्गनको कप्तानीमा रहेको इंग्ल्यान्ड तेस्रो पटक टि२० विश्वकपको फाइनलमा पुग्ने सोचमा छ । केन विलियम्यसनको कप्तानीमा रहेको न्युजिल्यान्ड पहिलो पटक फाइनलमा पुग्ने सोचमा छ । साढे दुई वर्षअघि इंग्ल्यान्ड र न्युजिल्यान्डबीच एकदिवसिय विश्वकप फाइनलमा प्रतिस्पर्धा गरेका थिए । इंग्ल्यान्डले सुपर ओभर पनि बराबर भएपछि बाउन्ड्री काउन्टको आधारमा उपाधि जितेको थियो । न्युजिल्यान्ड उक्त फाइनलमा बेहोरेको पिडाको बदला लिन चाहन्छ ।

ब्याटिङको पावर भएको इंग्ल्यान्ड र विलिम्यसको उत्कृष्ट कप्तानीमा सेमिफाइनल खेलेको न्युजिल्यान्डबीच कडा प्रतिस्पर्धाको अपेक्षा गरिएको थियो । मोर्गन र विलियम्सन वर्तमान समयका दुई उत्कृष्ट कप्तान मानिन्छन् । यी उत्कृष्ट दुई कप्तानको असली परिक्षा हुनेछ । २०१६ मा न्युजिल्यान्डलाई हराउँदै इंग्ल्यान्ड टि२० विश्वकपको फाइनलमा पुगेको थियो ।

इंग्ल्यान्ड ५ खेलमा ४ मा जित र १ मा हार सहित ८ अंक जोड्दै सुपर १२ को समूह १ मा शीर्षस्थानमा रहँदै सेमिफाइनलमा स्थान बनाएको थियो । सुपर १२ को समूह २ बाट न्युजिल्यान्ड ५ खेलमा ४ मा जित र १ मा हार सहित दोस्रो स्थानमा रहेर सेमिफाइनल खेलेको थियो । इंग्ल्यान्डले समूह चरणको अन्तिम खेलमा दक्षिण अफ्रिकासँग १० रनको हार बेहोरेको थियो ।

न्युजिल्यान्डले पहिलो खेलमा पाकिस्तानसँग ५ विकेटको हारको सामना गरेको थियो । इंग्ल्यान्डले वेस्टइन्डिजलाई ६ विकेट, बंगलादेश र अष्ट्रेलियालाई ८-८ विकेट र श्रीलंकालाई २६ रनले हराएको थियो । न्युजिल्यान्डले भारतलाई ८ विकेट, स्कटल्यान्डलाई १६ रन, नामिबियालाई ५२ र अफगानिस्तानलाई ८ विकेटले हराउँदै सेमिफाइनलमा स्थान पक्का गरेको थियो ।

न्युजिल्यान्ड कागजी रुपमा कमजोर मानिएपनि मैदानमा उत्कृष्ट प्रदर्शन गर्ने गर्दछ । उत्कृष्ट कप्तानी, टिम एकता र अनुशासनले उत्कृष्ट प्रभाव छाड्दै आएको छ । इंग्ल्यान्ड एक उत्कृष्ट टोली हो । विशेष गरि ब्याटिङ निकै मजबुत र गहिराई छ । दोस्रो सेमिफाइनलमा बिहीबार अष्ट्रेलिया र पाकिस्तानबीच प्रतिस्पर्धा हुनेछ । फाइनल आइतबार हुनेछ ।

हेड टु हेड

इंग्ल्यान्ड र न्युजिल्यान्डबीच कुल २१ टि२० आई खेल भएका छन् । जसमा इंग्ल्यान्ड १२ खेलमा विजयी हुँदा ७ खेलमा पराजित भएको छ । टि२० विश्वकपमा यी दुई टोलीबीच कुल ५ खेल भएका छन् । जसमा इंग्ल्यान्ड ३ र न्युजिल्यान्ड २ खेलमा पराजित भएको छ । २०१६ को सेमिफाइनलमा इंग्ल्यान्डले न्युजिल्यान्डलाई ७ विकेटले हराउँदै फाइनलमा स्थान बनाएको थियो । २०१४ मा न्युजिल्यान्ड ९ रन, २०१२ मा इंग्ल्यान्ड ६ विकेट, २०१० मा इंग्ल्यान्ड ३ विकेट र २००७ मा न्युजिल्यान्ड ५ रनले विजयी भएका थिए ।

इंग्ल्यान्डको प्लेइङ ११ :

ओईन मोर्गन (कप्तान), मोईन अली, जोनी बेयरस्टो, साम बिलिंग्स, जस बटलर, क्रिस जोर्डन, लियाम लिभिङस्टोन, डेविड मलान, आदिल राशिद, क्रिस वोक्स र मार्कवुड ।

न्युजिल्यान्डको प्लेइङ ११ :

केन विलियम्सन (कप्तान), ट्रेन्ट बोल्ट, डेभन कन्वे, मार्टिन गुप्टिल, ड्र्याल मिचेल, जिमी निशम, ग्लेन फिलिप्स, मिचेल सान्टनर, ईश सोधी, टिम साउथी र एडम मिल्ने ।

टि२० विश्वकपमा यी दुई टोलीको इतिहास

इंग्ल्यान्डले २०१० मा अष्ट्रेलियालाई ७ विकेटले हराउँदै उपाधि जितेको थियो । २०१६ मा वेस्टइन्डिजसँग ४ विकेटले पराजित भएको थियो । न्युजिल्यान्ड २००७ र २०१६ को संस्करणमा सेमिफाइनल यात्रा तय गरेको थियो ।