एजेन्सी – आइसिसी टि२० विश्वकप २०२१ को फाइनल खेलमा आज अष्ट्रेलिया र न्युजिल्यान्डबीच प्रतिस्पर्धा हुँदैछ । खेल नेपाली समय अनुसार दुबई इन्टरनेशनल क्रिकेट स्टेडियममा बेलुका ७ : ४५ मा सुरुहुनेछ । अष्ट्रेलिया र न्युजिल्यान्ड दुबै पहिलो पटक टि२० विश्वकप उपाधि जित्ने सोचमा छन् ।

पहिलो सेमिफाइनल खेलमा न्युजिल्यान्डले इंग्ल्यान्डलाई ५ विकेटले हराउँदै पहिलो पटक फाइनलमा स्थान बनाएको थियो । दोस्रो सेमिफाइनल खेलमा अष्ट्रेलियाले पाकिस्तानलाई ५ विकेटले हराउँदै दोस्रो पटक फाइनलमा पुगेको हो । न्युजिल्यान्ड पहिलो विश्वकप उपाधि जित्ने सोचमा छ । ओडिआईमा पाँच विश्वकप जितेको अष्ट्रेलिया टि२० विश्वकपमा पहिलो उपाधि हात पार्न चाहन्छ ।

अष्ट्रेलिया दोस्रो पटक टि२० फाइनल खेल्दैछ । सन् २०१० को टि२० विश्वकप फाइनलमा अष्ट्रेलिया इंग्ल्यान्डसँग ८ विकेटले पराजित भएको थियो । न्युजिल्यान्ड पहिलो फाइनलमै च्याम्पियन बन्ने सोचमा छ । विश्वकप अघि न्युजिल्यान्ड र अष्ट्रेलियालाई फाइनल पुग्नेमा कमैले विश्वास गरेका थिए । तर उत्कृष्ट प्रदर्शनका साथ फाइनलमा स्थान बनाएका हुन् । फाइनलमा प्रभाव जमाउन सक्ने दुबै टोलीका तीन तीन खेलाडी यस प्रकार छन् ।

डेविड वार्नर (अष्ट्रेलिया)

अष्ट्रेलिया ओपनर डेविड वार्नर लयमा फर्किएका छन् । बायाँ हाते ओपनर वार्नर वर्तमान समयका एक उत्कृष्ट आक्रामक विश्व प्रसिद्ध ब्याटर हुन् । तुलनात्मक रुपमा कमजोर मानिएको अष्ट्रेलियालाई फाइनलमा पुर्याउन वार्नरको योगदान महत्वपूर्ण छ । वार्नरले ६ खेलमा २ सय २६ रन बनाएका छन् ।

वार्नरले सेमिफाइनलमा पाकिस्तानविरुद्ध ३० बलमा ३ चौका र ३ छक्का सहित ४९ रनको महत्वपूर्ण इनिङ खेलेका थिए । समूह चरणमा वेस्टइन्डिज विरुद्ध ८९ र श्रीलंकाविरुद्ध ६५ रनको इनिङ खेलेका थिए । वार्नरले ३ सय १२ टि२० खेलमा ८ शतक र ८४ अर्धशतक सहित १ हजार २ सय ५५ रन बनाएका छन् । अनुभवी खेलाडी हुँदा दबाबमा राम्रो इनिङ खेल्न सक्छन् ।

मार्टिन गुप्टिल (न्युजिल्यान्ड)

न्युजिल्यान्डका ओपनर मार्टिन गुप्टिल टोलीका प्रमुख ब्याटिङ हतियार हुन् । उनको प्रदर्शन फाइनलमा निकै महत्वपूर्ण हुनेछ । गुप्टिलबाट न्युजिल्यान्ड उत्कृष्ट आक्रामक सुरुवात चाहन्छ । गुप्टिलले स्कटल्यान्डविरुद्ध ९३ रनको इनिङ खेलेका थिए । गुप्टिल विश्फोटक ब्याटिङको लागि चिनिन्छन् ।

उनले २ सय ८३ टि२० खेलमा ४ शतक सहित ८४ अर्धशतक सहित ८ हजार ६ रन बनाएका छन् । अनुभवी ब्याटर गुप्टिल पछिल्लो समय राम्रो लयमा छन् । गत मार्चमा अष्ट्रेलियासँग भएको पाँच टि२० आई सरिजमा पनि गुप्टिलले राम्रो प्रदर्शन गरेका थिए । उक्त सिरिजमा दोस्रो टि२० आई खेलमा ९७, तेस्रोमा ४३ र पाँचौं खेलमा ७१ रन जोडेका थिए । उनले आजको खेलमा आफ्नो प्रभाव जमाउन सक्छन् ।

मार्कस स्टोइनिस (अष्ट्रेलिया)

अलराउन्डर मार्कस स्टोइनिस अष्ट्रेलियाका फिनिसर हुन् । मध्यगतिका बलर स्टोइनिस आक्रामक सटहरु खेल्ने गर्दछन् । पाकिस्तानलाई सेमिफाइनलमा हराउन स्टोइनिसले तल्लोक्रममा ३१ बलमा २ चौका र २ छक्का सहित ४० रनमा महत्वपूर्ण अविजित इनिङ खेलेका थिए । स्टोइनिस जुनसुकै भूमिकामा आफ्नो प्रदर्शन देखाउन सक्छन् ।

स्टोइनिस श्रीलंकासँग १६ रनमा अविजित रहँदा इंग्ल्यान्डसँग शून्यमा आउट भएका थिए । अन्यमा ब्याटिङ गरेनन् । स्टोइनिस आफ्नो उत्कृष्ट फिनिसरमा टोलीको जित सहज बनाउन सक्छन् ।

ईश सोधी (न्युजिल्यान्ड)

न्युजिल्यान्डलाई फाइनलमा पुर्याउन स्पिनर ईश सोधीको प्रदर्शन उत्कृष्ट छ । सोधीले ६ खेलमा ९ विकेट लिई सकेका छन् । सोधीले भारतलाई ८ विकेटले हराउन महत्वपूर्ण दुई विकेट लिएका थिए । गत मार्चमा न्युजिल्यान्डसँग भएको पाँच टि२० आई सिरिजमा सोधी प्लेयर अफ द सिरिज चुनिएका थिए ।

मिचेल मार्श (अष्ट्रेलिया)

अलराउन्डर मिचेल मार्श राम्रो लयमा छन् । यस वर्ष मार्शले २० टि२० आई खेलमा ५ अर्धशतक सहित ५ सय ५० रन बनाएका छन् । पाकिस्तानलाई सेमिफाइनलमा हराउन मार्शले २२ बलमा ३ चौका र १ छक्का सहित महत्वपूर्ण २८ रन जोडेका थिए । त्यसअघि वेस्टइन्डिजविरुद्ध ५३ रनमा अविजित थिए । मार्शले मध्य गतिमा राम्रो बलिङ पनि गर्ने गर्दछन् । उनीले बल र ब्याट दुबैमा राम्रो योगदान दिन सक्छन् ।

केन विलियम्सन ( न्युजिल्यान्ड )

केन विलियम्सन न्युजिल्यान्डका प्रमुख हतियार हुन् । ब्याटिङमा उनको प्रदर्शन महत्वपूर्ण हुनेछ । जिम्मेवारीका साथ प्रदर्शन गर्ने विलियम्सन आफ्नो उत्कृष्ट ब्याटिङमा टोलीलाई सहज जित दिलाउन सक्छन् । अर्कोतर्फ टोली च्याम्पियन बन्न कप्तानी पनि उत्कृष्ट हुनुपर्छ ।

विलियम्सन वर्तमान समयका उत्कृष्ट कप्तान हुन् । आफ्नो उत्कृष्ट कप्तानीमा खेल जिताउन सक्छन् । यसअघि विलियम्सनले प्रमणित गरि सकेका छन् । विलियम्सन अष्ट्रेलियालाई घातक बन्न सक्ने न्युजिल्यान्डका खेलाडी हुन् । यस विश्वकपमा विलियम्सनले अफगानिस्तानविरुद्ध ४० रन र भारतविरुद्ध ३३ रनको अविजित इनिङ खेलेका थिए ।

न्युजिल्यान्ड र अष्ट्रेलियाबीचको फाइनल बारे सम्पूर्ण जानकारी पाउन यो पनि पढ्नुहोस् : टि२० विश्वकप फाइनल : उपाधिको लागि अष्ट्रेलिया र न्युजिल्यान्ड भिड्दै