काठमाडौं (हाम्रो खेलकुद) – नेपाल क्रिकेट संघ (क्यान) ले आइसिसी विश्वकप लिग–२ त्रिकोणात्मक ओडिआई सिरिजको लागि स्कटल्यान्ड र क्यानडासँग सिरिज खेल्ने राष्ट्रिय टोलीलाई बिदाई गरेको छ ।

क्यानले सोमबार एक कार्यक्रमका बीच क्यानाडा हुँदै स्कटल्यान्ड जाने नेपाली टोलीलाई बिदाई गरेको हो । बिदाई कार्यक्रममा राष्ट्रिय खेलकुद परिषद् (राखेप) का सदस्य सचिव टंकलाल घिसिङ, क्यानका अध्यक्ष चतुर बहादुर चन्द, कार्यवाहक सचिव प्रशान्त विक्रम मल्ल, कोषाध्यक्ष रोशन सिंह लगायतको उपस्थित थियो ।

कप्तान सन्दीपले स्कटल्यान्डमा आफूहरुलाई चुनौती हुने बताए । ‘तयारीको रुपमा हामीले अमेरिकाबाट फर्केपछि खेलाडीलाई विश्राम र परिवारको समय दिएका थियौं । धेरै तयारी गर्न पाएका छैनौं । टिम एकदमै सन्तुल थियो’, सन्दीपले भने । त्यसैमा थपे ‘क्यानाडामा राम्रो गरेर स्कटल्यान्ड जान चाहन्छौं । स्कटल्यान्डमा हामीले जित्नु पर्ने त्यतिनै आवश्यक छ । टिम राम्रो बाटोमा गएमा सबैलाई विश्वास छ । टिम एकता देखि सबै कुरामा एकअर्काको साथमा छौं । युवा टोली हुँदा सबैले अनुभव लिएका छौं । यो भ्रमण सबैको लागि महत्वपूर्ण हुनेछ । त्यतिनै चुनौती पनि हुनेछ ।’

क्यानका अध्यक्ष चतुरबहादुर चन्दले अमेरिका भ्रमणमा आफूहरुले जित्नुपर्ने दुई खेल हारेको बताए । ‘सबै खेलाडीमा क्षमता छ । सबैले मिहिनेत गरेका छन् । सानो गल्तीको कारण दुई अंक गुमाउनु पर्यो । अंक गुमेपछि सबै चिन्तित भयौं । हामीले यो भन्दा उत्कृष्ट टोली अव खोजेर पनि बनाउन सकिदैन । जे छ वहाँहरुनै हो । नतिजा पनि दिनी उनीहरुले नै हो । म शुमकामना दिन चाहन्छु’, चन्दले भने ।

बिदाई कार्यक्रममा राखेप सदस्य सचिव टंकलाल घिसिङले टिम खेल हुँदा त्यसै अनुसार प्रदर्शन गर्न आग्रह गरे । ‘मलाई विश्वास छ । हिजो जति उचाई हासिल गरेको थियो । त्यसमा सिङ्गो देशले आशा राखेको छ । त्यो विश्वास र भरोसाको साथ शुभकामना दिन चाहन्छु’, घिसिङले भने ।

बिदाई कार्यक्रममा मुख्य प्रशिक्षक पुबुदु दसानायिकले भने थिएनन् । पुबुदु अमेरिका भ्रमणपछि क्यानाडा गएको हुँदा टोलीसँग सिधैं क्यानाडामा जोडिने छन् । टोली मंगलबार बिहान क्यानडातर्फ लाग्नेछ । त्यहाँ एक अभ्यास खेल र क्यानाडासँग दुई एकदिवसिय खेलपछि टोली स्कटल्यान्ड जानेछ । नेपाल, स्कटल्यान्ड र नामिबियाबीच त्रिकोणात्मक ओडिआई सिरिज हुनेछ ।

 नेपाललाई आगमी वर्ष हुने एकदिवसिय विश्वकप ग्लोबल छनोट सिधैं खेल्न र ओडिआई मान्यतालाई निरन्रता दिन बाँकी सबै खेल खेल्नु पर्ने हुन्छ । नेपाल १६ खेलमा ७ मा जित, ८ मा हार र १ खेल टाईका साथ १५ अंक जोड्दै पाँचौं स्थानमा छ ।

नेपालको टोली :

सन्दीप लामिछाने (कप्तान), रोहित पौडेल (उपकप्तान), आसिफ शेख (विकेटकिपर), कुशल भुर्तेल, देव खनाल, दीपेन्द्रसिंह ऐरी, आरिफ शेख, करण केसी, सोमपाल कामी, आदिल अन्सारी, बसिर अहमद, किशोर महतो, पवन सरार्फ र विनोद भण्डारी (विकेटकिपर) ।

नेपालको खेल तालिका

असार १७ (जुलाई १) : नेपालविरुद्ध ओन्टारियो अभ्यास खेल

असार २० (जुलाई ४) – नेपालविरुद्ध क्यानडा, पहिलो एकदिवसिय खेल

असार २१ ( जुलाई ५) – नेपालविरुद्ध क्यानडा, दोस्रो एकदिवसिय खेल

स्कटल्यान्ड भ्रमणमा नेपालको खेल तालिका

असार २७ ( जुलाई ११) – नामिवियाविरुद्ध नेपाल

असार २९ ( जुलाई १३) – स्कटल्यान्डविरुद्ध नेपाल

असार ३२ ( जुलाई १६) – नेपालविरुद्ध नामिबिया

साउन १ ( जुलाई १७) – नेपालविरुद्ध स्कटल्यान्ड