एजेन्सी – जर्मन क्लब बोरुसिया डर्टमुन्डले आइभोरी कोस्टका फरवार्ड सेवास्टिन हालेरलाई क्लबमा अनुबन्ध गरेको छ । डर्टमुन्डले हालेरलाई डच क्लब आयाक्सबाट २९ मिलियन पाउन्डमा चार वर्षको लागि क्लबमा अनुबन्ध गरेको हो ।

उनी २०२६ सम्म सिग्नल इडुना पार्कमा रहनेछन् । २८ वर्षीय हालेरले १८ महिनामै आयाक्स छाड्ने निर्णय गरेको हो । उनलाई डर्टमुन्डमा एर्लिङ ब्राउट हालान्डको विकल्पको रुपमा हेरिएको छ । हालान्ड यसै समरमा इंग्लिस च्याम्पियन म्यानचेस्टर सिटीमा अनुबन्ध भइसकेका छन् ।

फ्रान्सको उमेर समूहबाट प्रतिनिधित्व गरिसकेका हालेर २०२० देखि आइभोरी कोस्टको राष्ट्रिय टोलीबाट खेलिरहेका छन् ।गत सिजन आयाक्सका लागि सबै ४२ खेलमा ३४ गोल गरेका हालेरले च्याम्पियन्स लिगमा मात्रै ११ गोल गरेका थिए । जुन करिम बेन्जेमा र रोबर्ट लेवान्डोस्कीको भन्दा कम हो ।

डर्टमुन्डमा अनुबन्ध भएसँगै हालेरले क्लबको हिस्सा बन्न पाउँदा खुशी लागेको ८० हजार भन्दा बढी दर्शकहरुको समर्थनलाई महसुस गर्न पर्खन नसक्ने बताएका छन् ।

डर्टमुन्डका खेलकुद निर्देशक केहलले सेवास्टिएनलाई अनुबन्ध गर्न सक्षम भएकोमा धेरै खुशी रहेको बताएका छन् । ‘उनी एक अनुभवी सेन्टर फरवार्ड हुन् । जसले च्याम्पियन्स लिगमा गत सिजन सनसनी मच्चाएका थिए । हामीले उनीबाट डर्टमुन्डमा पनि आगामी सिजनको लागि उच्च प्रदर्शनको अपेक्षा गरेका छौं ।’ केहलले भने ।

नयाँ सिजनको लागि डर्टमुन्डको यो चौथो अनुबन्ध हो । यसअघि डर्टमुन्डले रेडबुल साल्जवर्गबाट करिम एडिएमीलाई ३२ मिलियन पाउन्डमा अनुबन्ध गरिसकेको छ । यस्तै निको स्लोटरबेक र निकलस सुल पनि डर्टमुन्ड आएका छन् ।