काठमाडौं (हाम्रो खेलकुद)– टाइगर ग्रुप अफ पोखरा नेपालको आयोजनामा हुने टाइगर कप राष्ट्रिय/अन्तर्राष्ट्रिय महिला तथा पुरुष भलिबल प्रतियोगिताको तेस्रो संस्करण माघमा हुने भएको छ ।

टाइगर ग्रुपको प्रस्ताव अनुसार माघ ८ देखि १४ गते सम्म टाइगर कप सन्चालनका लागि नेपाल भलिबल संघले स्वीकृती प्रदान गरेको छ । संघको कात्तिक १५ गते बसेको कार्यसम्पादन समितिले टाइगर कप आयोजनाका लागि स्वीकृती दिएको हो । टाइगर कप पोखरा रंगशाला हातामा रहेको भलिबल कोर्टमा हुनेछ । पोखरामा सर्वाधिक दर्शकहरुले हेर्नेमध्ये टाइगर कप भलिबल प्रतियोगिता प्रर्दछ ।

गत वर्ष महिला र पुरुषतर्फ समान ५ टोलीको सहभागिता रहेको थियो । दुवैतर्फको च्याम्पियन टोलीले समान ३ लाख रुपैयाँ, दोस्रो हुने टोलीले १ लाख ५० हजार, तेस्रोले ७५ हजार तथा चौथो टोलीले ३५ हजार रुपैयँ प्राप्त गरेको थियो ।

यसपटक सहभागी टोलीमा बृद्धि हुने सम्भावना रहेको आयोजक टाइगर ग्रुपका अध्यक्ष नारायण शर्माले जानकारी दिए । ‘महिला र पुरुष दुवैतर्फ भारतीय क्लबलाई सहभागिता गराउने सोचका साथ तयारी अघि बढाएका छौं,’ शर्माले भने, ‘केहि दिनमा यो विषयमा टुंगो लाग्नेछ । विगतमा भन्दा अझै स्तरीय प्रतियोगिता आयोजना गर्ने हाम्रो प्रयास हुनेछ ।’

गत संस्करण महिलातर्फ एपिएफ र पुरुषतर्फ त्रिभुवन आर्मी क्लबले जितेको थियो । पहिलो संस्करणमा भने महिलामा नेपाल पुलिस क्लब र पुरुषमा गण्डकी प्रदेश विजयी भएको थियो ।