काठमाडौं (हाम्रो खेलकुद) – नेपाल क्रिकेट संघ(क्यान)का पूर्वउपाध्यक्ष नरेश श्रेष्ठको उपचारको क्रममा शुक्रबार निधन भएको छ । काठमाडौंको टिचिङ अस्पतालमा उनको ७६ वर्षको उमेरमा निधन भएको हो ।

श्रेष्ठलाई आजनै पशुपति आर्यघाटमा लगेर अन्तिम अन्तेष्टि समेत गरिएको छ । उनको पार्थिव शरीरमा क्यानका अध्यक्ष चतुरबहाुदर चन्दले झण्डै ओडाउदै अन्तिम श्रद्धान्जली दिएका थिए । श्रेष्ठ वर्तमान समयका क्यानका बरिष्ठ सल्लाहकार समेत थिए ।

उनका दुई छोरा छन् । दुबै छोराले नेपाली क्रिकेट टोलीबाट खेलि सकेका छन् । अलराउन्डर मन्जित र युनिलले एक समय नेपाली क्रिकेट टोलीबाट सँगै खेलेका थिए । युनिल वर्तमान नेपाली क्रिकेट टोलीका छनोट समितिका सदस्य समेत हुन् । उनकी छोरी रिचाको केहि वर्षअघि अष्टेलियामा बोन म्यारो क्यान्सरको कारण मृत्यु भएको थियो । स्वर्गीय रिचाको नाममा अष्टेलियामा क्रिकेट प्रतियोगिता समेत आयोजना हुँदै आएको छ ।

विराटनगर बर्गाछी चोक घर भएका उनलाई ट्युमर र क्यान्सरले लामो समयदेखी सताएको थियो । उनी क्यान आइसिसीको निलम्बनमा पर्नुअघि उपाध्यक्ष थिए ।

नेपाली क्रिकेट विकासमा निकै लामो योगदान दिएका श्रेष्ठलाई सन् २००९ मा आइसिसीले शताब्दी पदकबाट सम्मान पनि गरेको थियो ।