एजेन्सी – घरेलु टोली युएईले दोस्रो टि२० आई खेलमा टेस्ट टोली न्युजिल्यान्डविरुद्ध सानदार बलिङ प्रदर्शन गरेको छ । न्युजिल्यान्डले युएईलाई जितको लागि १ सय ४३ रनको मध्यम लक्ष्य दिएको छ ।

दुबई इन्टरनेशल क्रिकेट स्टेडियममा टस हारेर पहिला ब्याटिङको निम्तो पाएको न्युजिल्यान्डले निर्धारित २० ओभरमा ८ विकेट गुमाउँदै १ सय ४२ रन बनायो । न्युजिल्यान्डका मार्क च्यापम्यानले ४६ बलमा ३ चौका र ३ छक्कासहित सर्वाधिक ६३ रनको योगदान दिए । उनी बाहेक कुनैपनि ब्याटरले राम्रो प्रदर्शन गर्न सकेनन् ।

एक समय ११.३ ओभरमा ६५-५ को अवस्थामा रहेको न्युजिल्यान्डलाई छैटौं विकेटका लागि मार्क च्यापम्यान र जेम्श निशमले ३२ बलमा ५३ रनको साझेदारी गरेका थिए । निशम १७ बलमा २ चौकासहित २१ रनमा क्याच आउट भए ।

तीव्र गतिका बलर मोहम्मद जवादुल्लाहले तेस्रो ओभरमै प्रमुख ब्याटर टिम सिफर्टलाई ७ रनमा बोल्ड आउट गरे । त्यसपछि स्पिनर आयन खानले न्युजिल्यान्डको ब्याटिङ धरासयी बनाएका थिए । आयन खानले पाँचौं ओभरमा लगातार दुई विकेट लिएपछि युएई खेलमा हाबी बनेको थियो ।

विकेटकिपर डेन क्लेभरलाई १ र मिचेल सान्टनारलाई आयनले शून्यमा बोल्ड गर्दै लगातार दुई विकेट लिएका थिए । स्पिनर मोहम्मद फराजुदीनले कोले म्याकोन्चीलाई ९ रनमा आउट गराए । आयनले ओपनर चाद बोवेसलाई २१ रनमा स्टम्पिङ आउट गराए । उनले २१ बलमा २ चौका र १ छक्का प्रहार गरे ।

काइल जेमिसन ८, टिम साउथी ४ र रचिन रविन्द्रले २ रन बनाए । युएईका आयन खानले ४ ओभरमा २० रन खर्चेर ३ विकेट लिए । मोहम्मद जवादुल्लाहले ४ ओभरमा १६ रन खर्चेर २ विकेट लिए । अली नासिर, जहुर खान र मोहम्मद फराजुदीनले समान एक विकेट लिए । तीन खेलको सिरिजमा न्युजिल्यान्ड १(० ले अघि छ ।