काठमाडौं (हाम्रो खेलकुद) – नेपालका अलराउन्डर गुलशन झाले आइसिसी टि२० विश्वकप एसिया क्षेत्र फाइनल छनोटको फाइनल खेलमा ओमानविरुद्ध आक्रामक अर्धशतक प्रहार गरेका छन् । गुलशनले २० बलमा आफ्नो टि२० आई करिअरको पहिलो अर्धशतक प्रहार गरेका छन् ।

दीपेन्द्रसिंह ऐरीले मंगोलियाविरुद्ध अघिल्लो महिना ९ बल र २०१९ मा ज्ञानेन्द्र मल्लले २० बलमा मलेसियाविरुद्ध टि२० आईमा अर्धशतक पूरा गरेका थिए । समग्र रुपमा उनी नेपालबाट संयुक्त रुपमा छिटो अर्धशतक प्रहार गर्ने दोस्रो खेलाडी हुन् ।

गुलशन झा २२ बलमा ५ चौका र ४ छक्कासहित ५२ रनमा क्रिजमा छन् । उनलाई रोहित पौडेलले २५ बलमा २ चौकासहित २२ रनमा साथ दिएका छन् ।

टियु क्रिकेट मैदानमा टस जितेर पहिला ब्याटिङ रोजेको नेपालले १६ ओभरमा ४ विकेट गुमाउँदै १ सय २८ रन बनायो । बिलाल खानको तेस्रो ओभरको चौथो बलमा आसिफ शेख एक्स्ट्रा कभरमा कश्याप प्रजापतिबाट ६ रनमा क्याच आउट भए ।

बिलालले स्वलो बलमा आसिफलाई फसाएका थिए । कुशल भुर्तेलले ब्यक्तिगत १८ रनमा जीवनदान पाएका थिए । तीव्र गतिका बलर फयाज बटको पाँचौं ओभरको अन्तिम बलमा कुशलको क्याच कभरमा आयन खानले छाड्न पुगेका थिए ।

तर कुशलले त्यसलाई भरपूर्ण फाइदा उठाउन सकेनन् । अकिब इल्यासले टोलीको योजना अनुसार डीप स्क्वायर लेगमा कुशल भुर्तेललाई मेहरान खानबाट क्याच आउट गराएका थिए ।

सन्दीप जोरा कप्तान जिशान मकसुदको बलमा १० रनमा बोल्ड आउट भए । अकिबले पुन टोलीको योजना अनुसार कुशल मल्ललाई आउट गरे । कुशलको कमजोरीलाई ध्यानमा राख्दै अफ बलमा अकिबले बोल्ड आउट गरे ।

कुशल मल्ल ३ रनमा बोल्ड आउट भए । एक समय नेपाल १० ओभरमा ६०(४ को अवस्थामा थियो । त्यसपछि गुलशन र रोहितको साझेदारीले खेल फर्किएको छ ।