काठमाडौं (हाम्रो खेलकुद) – माघको दोस्रो साता काठमाडौंमा हुने १६ औं ढोरपाटन महिला डबल लिग भलिबल प्रतियोगितामा दुई खेलाडीले एम्पीयर स्कुटर पाउने भएका छन् ।

आयोजक ढोरपाटन क्लब र एम्पीयर स्कुटरको नेपाल विक्रेता केडिया इन्टरनेसनल प्रालिबीच बुधबार सहकार्य सम्झौता भएको हो । क्लबका तर्फबाट अध्यक्ष मनवीर छन्त्याल र केडियाको तर्फबाट प्रबन्ध निर्देशक सत्यम केडियाले सम्झौता पत्रमा हस्ताक्षर गरे ।

सम्झौता अनुसार क्लबले लिगको सर्वोत्कृष्ट खेलाडी र वर्ष खेलाडीलाई एम्पीयर स्कुटर प्रदान गर्नेछ । खेलाडीलाई एम्पीयरको प्राइमस र म्यागनस स्कुटर प्रदान गरिनेछ । यसका लागि कम्पनीले स्कुटरमा ३३ प्रतिशत छुट दिने सम्झौता रहेको छ ।

प्रबन्ध निर्देशक केडियाले भलिबल खेल नेपाली समाजको पाटो भएकाले सहकार्य गर्ने भएको बताए । ‘भलिबल खेल नेपालको सबै ठाउँमा खेलिन्छ । हामी खेल संस्कृतिसँगै समाजमा परिवर्तन पनि ल्याउन चाहन्छौं । हाम्रो कम्पनिको प्रयास जनमानसमा जागरण गराउनु पनि हो । हामी हरेक व्यक्तिमा यो संस्कार विकास गर्न चाहन्छौं,’ उनले भने ।

उनले नेपालमा विद्युतीय सवारी साधनको आगमनले वातावरणमा पनि सहयोग पुग्ने हुनाले सार्वजनिक बजारमा पुग्न यो सहकार्य गरेको बताए ।

ढोरपाटन महिला लिग २०७६ पछि आयोजना हुन लागेको हो । कोरोना भाइरस (कोभिड–१९) पछि प्रतियोगिता रोकिएको थियो । माघ १२ देखि २२ गतेसम्म चल्ने प्रतियोगितामा बढीमा ९ टोलीको सहभागिता रहनेछ ।

प्रतियोगिताको विजेता ५ लाख १ हजार र दोस्रो हुने टोलीले २ लाख ५० हजार रुपैयाँ प्राप्त गर्नेछन् । अघिल्लो संस्करणको विजेताले ४ लाख ५ हजार रुपैयाँ प्राप्त गेर्नछ ।

यसपटक तेस्रोले १ लाख २५ हजार, चौथोले ७५ हजार, पाँचौले ५० हजार, छैटौले टोलीले २५ हजार रुपैयाँ प्राप्त गर्नेछ । विधागतका उत्कृष्टलाई समान ५ हजार पाउनेछन् । प्लेयर अफ दि म्याच र भाग्यशाली दर्शकको लागि पनि आकर्षक पुरस्कार राखिएको क्लबका अध्यक्ष छन्त्यालले जानकारी दिए ।

१५औं संस्करणसम्म आइपुग्दा एपिएफले सर्वाधिक ८ पटक उपाधि जितेको छ । ५ पटक पोखराको ज्ञानुबाबाले जितेको थियो ।

नेपाल पुलिस क्लब र रिड मोडल समान १ पटक जितेका थिए । ढोरपाटनले गत वर्ष आयोजना गरेको पुरुष प्रतियागिताको आर्मी च्याम्पियन बनेको थियो । १६औं संस्करणको ढोरपाटन महिला डबल लिग भलिबल प्रतियोगिताको झण्डै ५१ लाख रुपैयाँ खर्च हुने क्लबको अनुमान छ ।