लन्डन (एजेन्सी)– हेरी केनको पेनाल्टी गोलमा मिडल्सब्रोलाई १–० ले हराएपछि टोटेनह्यामले तेस्रो स्थानको आर्सनललाई ३ अंकले पछाडी पारेको छ । आर्सनल शनिबारको खेलमा शीर्षस्थानको चेल्सीसँग ३–१ ले पराजित भएको थियो । शीर्ष चार टोलीमध्ये चेल्सी र टोटेनह्याम विजयी भएका थिए भने आर्सनल र लिभरपुलले हारको सामना गर्नु परेको थियो ।

५८ औं मिनेटमा केनले पेनाल्टीमार्फत गोल गरेपछि त्यो गोल जितका लागि पर्याप्त रह्यो । सोन हुङ मिनलाई बेर्नाडोले फाउल हानेपछि टोटेनह्यामले पेनाल्टी पाएको थियो । मिडल्सब्रोले खेलको अन्त्यतिर बराबरीको मौका पाएपनि सफल हुन सकेन । मार्टेन डी रुनको प्रयास पोस्ट नजिकबाट बाहिरिीएको थियो । मिडल्स ब्रोसँगको पछिल्लो तीन भेटमा पहिलो जित दर्ता गराएको टोटेनह्याम शीर्षस्थानको चेल्सी भन्दा ९ अंकले पछाडी छ ।

२४ खेलपछि चेल्सीको ५९ र टोटेनह्यामको ५० अंक छ । चौथो स्थानको लिभरपुल हल सिटीसँग २–० ले स्तब्ध भएको थियो । अलफ्रेड एडिएले पहिलो र बाय उमर नेसीले दोस्रो हाफमा गोल गरेपछि हलको जित पक्का भएको थियो । त्यस्तै गोलको बर्षा भएको खेलमा एभर्टनले ब्रोनमाउथलाई ६–३ ले हरायो ।

अन्य खेलमा सन्डरल्यान्डले क्रिस्टल प्यालेसलाई ४–० ले, वेस्टह्याम युनाइटेडले साउथ ह्याम्टनलाई ३–१ ले, वाटफोर्डले बर्नलीलाई २–१ ले वेस्टब्रुम विचले स्टोक सिटीलाई १–० ले हराएको थियो ।
तेस्रो स्थानको आर्सनलको ४७ र चौथो स्थानको लिभरपुलको ४६ अंक छ । हल सिटी र सन्डरल्यान्ड जितका वावजुद क्रिस्टलप्यालेससँग रेलिगेसन क्षेत्रमा छन् ।