काठमाडौं (हाम्रो खेलकुद) – काभा नेसन्स लिगमा उपविजेता बन्न सफल नेपाली महिला राष्ट्रिय भलिबल टोलीलाई भलिबल समर्थकले नगदसहित सम्मान गरेका छन् ।

फाइनलमा भारतसँग पराजित भएपछि उपविजेतामा सिमित भएको टोलीलाई भलिबल समर्थक तथा युवा व्यवसायी गणेश रिजालले नगदसहित सम्मान गरेका हुन् । नक्सालस्थित क्राउन प्लाजा होटलमा आयोजित कार्यक्रममा भलिबल संघका पदाधिकारी लगायत पूर्व राष्ट्रिय खेलाडीहरुको उपस्थिति रहेको थियो ।

कार्यक्रममा बोल्दै रिजालले भलिबल संघको आजीवन सदस्यता लिने निर्णय समेत सुनाए । उनले टोलीलाई नगद सम्मान तथा रात्री भोजको आयोजनाका लागि २ लाख रुपैयाँ टोलीलाई प्रदान गरेका थिए । ‘एक भलिबल समर्थकको नाताले टोलीलाई सम्मान गर्न पाउँदा खुसी छु । आशा छ आउने दिनमा यसले टोलीको हौसला आझ बढ्नेछ । म सम्भव भए भलिबल संघको आजीवन सदस्य पनि लिनेछु,’ उनले बताए ।

कार्यक्रममा बोल्दै भलिबल संघका उपाध्यक्ष तथा प्लाजा होटल ग्रुपका अध्यक्ष युवराज श्रेष्ठले रिजालको कदममा धन्यवाद ज्ञापन गर्दै आफ्नो संस्थाबाट टोलीलाई एकमुष्ठ नगद १ लाखले सम्मान गर्ने घोषणा गरे । ‘फाइनलको भोलिपल्ट नै काठमाडौं महानगरले पुरस्कार वितरण नै गर्यो । भलिबल संघले पनि घोषणा गरेको छ, सरकार प्रक्रियामा छ । तर म निजि क्षेत्र मौन देखिरहेको छु । समर्थकले नै सम्मान गरेपछि अब निजि क्षेत्र जाग्ने आशा लिएको छु । म आफू रहेको संस्थाबाट पनि टोलीलाई १ लाख रुपैयाँले सम्मान गर्ने घोषणा गर्छु,’ श्रेष्ठले भने ।

नेपाली टोलीलाई फाइनलको भोलिपल्ट नै महानगरले जनही १ लाख रुपैयाँले सम्मान गरेको छ । त्यस्तै संघले हरेक खेलाडीलाई जनही ५० हजार रुपैयाँ प्रदान गर्ने घोषणा गरिसकेको छ ।