काठमाडौं (हाम्रो खेलकुद)- काभा मेन्स भलिबल क्लब च्याम्पियनसिपको दोस्रो दिन आज लिग चरणका दुई खेल हुनेछन्।

त्रिपुरेश्वरस्थित राष्ट्रिय खेलकुद परिषदको कभर्ड हलमा आज पहिलो खेल टिप टप हेल्प नेपाल स्पोर्ट्स क्लब र गण्डकी प्रदेशबीचमा हुनेछ। घरेलु दुई टोलीबीचको खेल रोमान्चक हुने अपेक्षा गरिएको छ। खेल दिउँसो २:३० बजे सुरु हुनेछ।

आठौं प्रधानमन्त्री कप एनभिए लिगको विजेताका रुपमा हेल्प नेपाल र उपविजेताका रुपमा गण्डकीले च्याम्पियनसिपमा नेपालको प्रतिनिधित्व गरिरहेका छन् ।
हेल्प नेपाल लगातार दोस्रो जित हात पार्ने दाउमा रहनेछ।

शनिवार उदघाटन खेलमा हेल्प नेपालले दाबेदार भारतको क्यालिकट हिरोजलाई ३-२ को सेटमा हराएको थियो। गण्डकी भने पहिलो जितको खोजीमा हुनेछ। हिजो माल्दिभ्सको क्लब एचडिसी विरूद्ध राम्रो सुरूवात गरेपनि पछिल्ला ३ सेट लगातार गुमाउँदा गण्डकी पराजित हुन पुगेको थियो।

दिनको दोस्रो खेलमा एक खेल जितिसकेको माल्दिभ्सको क्लब एचडिसीले इरानको यु-१८ सँग प्रतिस्पर्धा गर्नेछ।खेल साँझ ५ बजे सुरु हुनेछ।

क्लब एचडिसीले हिजो पहिलो खेलमा उत्कृष्ट कमब्याक गर्दै नेपालको गण्डकी प्रदेश भलिबल संघलाई ३-२ ले हराउँदै विजयी सुरूवात गरिसकेको छ। इरानी टोलीको यो पहिलो खेल हो।

च्याम्पियनसिपमा नेपाल सहित ४ राष्ट्रका ५ क्लबको सहभागिता रहेको छ। सिगंल राउन्ड रोबिन लिगमा १० खेल सहित च्याम्पियनसिपमा कुल १४ खेल हुनेछन्। लिगका शीर्ष ४ टोलीले सेमिफाइनल खेल्ने छन् ।

जहाँ लिगको शीर्षले तेस्रो तथा दोस्रोले चौथो टोलीको सामना गर्नेछ । फाइनल मंसिर २९ गते हुनेछ।च्याम्पियनसिपको हाम्रो खेलकुदको युट्युब र कान्तिपुर म्याक्स एचडीबाट प्रत्यक्ष प्रसारण भइरहेको छ।