काठमाडौं (हाम्रो खेलकुद)- गोर्खाली रग्बी क्लब पाँचौ फिफ्टिन्स रग्बी च्याम्पियनसिपको विजेता बनेको छ।

मंगलवार भएको लिगको अन्तिम दिनको खेलमा नेपाल पुलिस क्लबलाई ५५-० ले पराजित गर्दै गोर्खाली रग्बीले उपाधि रक्षा गरेको हो। जितसंगै गोर्खालीले लिगको तीनवटै खेल जित्दै लिग तालिकाको शीर्ष स्थानमा उक्लिएको थियो।

त्यसैगरी दिनको अर्को खेलमा त्रिभुवन आर्मी क्लबले नेपाल एपिएफ क्लबलाई एक संघर्षपूर्ण खेलमा १९-७ ले पराजित गर्दै दोस्रो भयो। गत वर्षको उपविजेता एपिएफ भने तेस्रो स्थानमा सीमित भयो। पुलिसले प्रतियोगितामा अंक बटुल्न सकेन।

प्रतियोगिताका विजेता खेलाडी टोलीलाई राष्ट्रिय खेलकुद परिषदका सदस्य सचिव टंकलाल घिसिङ, राखेप कार्यकारी सदस्य कमलबहादुर भट्टराई, नेपाल रग्बी संघका  वरिष्ठ उपाध्यक्ष चेतनराज गिरी र महासचिव गोविन्द घिमिरेले पुरस्कृत गरे।

विजेता गोर्खाली रग्बीले २ लाख २२ हजार २ सय २२ रुपैंया र आर्मीले १ लाख ११ हजार १ सय ११ रुपैयाँ प्राप्त गर्यो । गोर्खाली रग्बी क्लबका विजय खड्का प्रतियोगिताको सर्वोत्कृष्ट खेलाडी घोषित भए र १५ हजार रुपैयाँ प्राप्त गरे।

नेपाल रग्बी संघको आयोजनामा राउन्ड रोविन लिगको आधारमा सञ्चालन भएको खेलमा ३ विभागिय र गोर्खाली रग्बी गरी चार टोलीको सहभागिता रहेको थियो।

यो प्रतियोगिताबाट दुई महिनापछि नेपाल र बंगलादेश विच काठमाडौंमा हुने फिफ्टिन्स रग्बी श्रृंखलाको लागि खेलाडी छनोट गरिने नेपाल रग्बी संघले जनाएको छ।