एजेन्सी – लुइस डियाज बायर्न म्युनिख जाने पक्का भएको छ ।  जर्मन च्याम्पियन क्लबले लिभरपुलसँग एड-अनसहित ७५ मिलियन युरो बराबरको सम्झौता गरेपछि डियाज जाने निश्चित भएको हो ।

यसअघि बायर्नले कोलम्बियाली फरवार्डका लागि ५८.६ मिलियन पाउण्डको सुरुवाती प्रस्ताव राखेको थियो । त्यसलाई जुन लिभरपुलले अस्वीकार गरेको थियो।

२८ वर्षीय डियाजलाई लिभरपुलले शनिवार हङकङमा भएको एसी मिलानविरुद्धको ४-२ मैत्री खेलको टोलीमा राखेको थिएन। अब उनलाई मेडिकल परीक्षणका लागि एसियाबाट युरोप जान लिभरपुलले अनुमति दिएको छ।

लिभरपुलले फ्लोरियन विर्ट्स र ह्युगो एकीटिके अनुबन्ध गरिसकेको छ ।  न्युक्यासल युनाइटेडका अलेक्जान्डर इसाकप्रति पनि चासो देखाइरहेको छ।

डियाज सन् २०२२ को जनवरीमा पोर्टोबाट ३७ मिलियन पाउण्डको प्रारम्भिक मूल्यमा लिभरपुल गएका थिए । उनले क्लबका लागि १ सय ४८ खेलमा ४१ गोल गरेका छन् ।  गत सिजन प्रिमियर लिग उपाधि जित्दा उनमे १३ गोल गरेका थिए।

२०२४–२५ सिजनमा उनले सबै प्रतियोगितामा १७ गोल गर्दै आफ्नो व्यक्तिगत सबैभन्दा उत्कृष्ट सिजन बनाएका थिए।

बायर्नले गत सिजन आफ्नो ३४औं बुन्डेसलिगा उपाधि जितेको थियो । लिगमा सबैभन्दा धेरै ९९ गोल गरेको थियो। तर जर्मन कपको अन्तिम १६ बाट र च्याम्पियन्स लिगको क्वाटरफाइनलबाट बाहिरिएको थियो।