काठमाडौँ (हाम्रो खेलकुद) – नेपाल नम्बर १ शिवराम श्रेष्ठले सुर्य नेपाल गल्फ टुर २०१६/१७ अन्तर्गत भएको सातौं इभेन्ट, सुर्य नेपाल एनपीजीए टुर च्याम्पियनसिपको उपाधि जितेका छन्।
गोकर्ण गल्फ क्लबमा खेलिएको अन्तिम दिनमा शिवरामले अघिल्ला दिनझै १ अन्डर ७१को स्कोर बनाउँदै उपाधि हात पारेका हुन्। ४ दिने प्रतियोगिताको चारै दिन उनले सोहि स्कोर बनाउँदै समग्रमा ४ अन्डर २८४को स्कोर बनाएका थिए। श्रेष्ठले उपाधिसहित रु. १ लाख १० हजारको चेक प्राप्त गरे। शिवरामको करियरको यो ३५औं उपाधि हो।
दोश्रो स्थानमा रहेका सुर्य प्रसाद शर्माले आजको खेलमा २ ओभर ७४को स्कोर बनाउँदै समग्रमा १ ओभर २८९ बनाए। उनले रु ७० हजार प्राप्त गरे भने तेश्रो स्थानमा रहेका संजय लामाले रु. ५० हजार जिते। समग्रमा २ ओभर २९० स्कोर जोडेका संजयले दिनको खेलमा २ ओभर ७४ बनाएका थिए।
चौथो स्थानमा ४ ओभर २८९ बनाएका रामे मगर र भुवन नगरकोटीले समान ३७ हजार ५ सय रुपैंया हात पारे भने छैठौं स्थानमा रहेका राजेन्द्र थापा मगरले ३० हजार रुपैंया जिते। सातौं स्थानमा रहेका जयराम श्रेष्ठ र रबि खड्काले २६ हजार जित्दा नवौं स्थानमा रहेका पशुपति शर्माले २३ हजार पाए। दशौँ स्थानमा रहेका आर्मी क्लबका व्यावसायिक गल्फर धन थापाले २१ हजार जिते। एमेच्योर तर्फको उपाधि टंक बहादुर कार्कीले जिते भने दोश्रो स्थानमा तेन्जिङ छिरिङ रहे।
कुल ४० खेलाडी सहभागी प्रतियोगितामा ३३ व्यवसायिक र ७ एमेच्योर खेलाडी रहेका थिए। प्रतियोगिताको कुल पुअस्कर राशी ६ लाख रुपैंया रहेको थियो। सुर्य नेपाल प्रा.लि. अन्तर्गत सेल्स एण्ड मार्केटिङका उपाध्यक्ष दिप्रा लाहिरी र नेपाल गल्फ संघका अध्यक्ष टाशी घलेले पुरस्कार वितरण गरेका थिए।
