काठमाडौं (हाम्रो खेलकुद) – शेरबहादुर खड्का स्मृति प्रतिष्ठानको आयोजनामा हुने राष्ट्रिय महिला भलिबल प्रतियोगिताले बहुउद्देश्यीय पेन्ट कम्पनी केएनपी जापान प्रालिको साथ पाएको छ । मुख्य प्रायोजकको लागि प्रतिष्ठानका अध्यक्ष रन्जन खड्का र बहुउद्देश्यीय पेन्ट कम्पनी केएनपी जापान प्रालिका कन्ट्री डाइरेक्टर मनोज मिश्रले शनिबार सम्झौतापत्रमा हस्ताक्षर गरे ।
सम्झौता अनुसार प्रतियोगिताको नाम ‘केएनपी राष्ट्रिय महिला भलिबल प्रतियोगिता’को नामबाट सञ्चालन हुनेछ । मुख्य प्रायोजन गरेबापत कम्पनीले आयोजकलाई नगद पाँच लाख उपलब्ध गराउने छ । कन्ट्री डाइरेक्टर मिश्रले भलिबल खेल नेपालको राष्ट्रिय खेल भएकोमा बधाई दिदैं आगामी दिनमा पनि भलिबललाई प्राथामिकता दिने प्रतिवद्धता जनाए । यस्तै प्रतियोगिताको सह–प्रायोजकका रुपमा शिवम् सिमेन्ट रहेको छ प्रतियोगिताको प्रथम पुरस्कारको प्रायोजन क्वायरटुफ म्याट्रेस्ले गरेको छ ।
प्रतियोगिताका विजेताले एक लाख ५० हजार, उपविजेताले एक लाख र तेस्रो हुने टोलीले नगद ५० हजार रुपैयाँ प्राप्त गर्नेछन् । प्रतियोगिताका सम्पूर्ण खेल त्रिपुरेश्वरस्थित राखेप कभर्डहलमा हुनेछ । त्यस्तै प्रतियोगितामा केएनपी सर्वोकृष्ट खेलाडीलाई एयर एसियाले काठमाडौं मलेसिया–काठमाडौंको आउने जाने हवाई टिकट प्रदान गर्नेछन् ।
शेरबहादुर खड्का स्पेशल अवार्डबाट एक जना खेलाडी नगद १० हजारसहित सम्मानित हुनेछन् । उत्कृष्ट प्रशिक्षक हुनेले माउन्टेन फ्लाईटको टिकट प्रदान गरिनेछ । बेस्ट स्पाइकर, बेस्ट क्वीकर, बेस्ट सेटर, बेस्ट ब्लकर, बेस्ट डिफेन्स र बेस्ट सर्भरले जनही तीन हजार रुपैयाँसहित आर्कषक ट्रफी प्राप्त गर्नेछन् । राइजिङ प्लेयरबाट तीन हजार रुपैयाँसहित एक प्रतिभावान खेलाडीलाई पुरस्कृत गरिने आयोजकले जनाएको छ ।
लिगकम नकाउटका आधारमा जेठ २३ देखि २६ गतेसम्म सञ्चालन हुने प्रतियोगितामा नेपाल एपिएफ क्लब, न्यु डायमन्ड, नेपाल पुलिस क्लब, पश्चिमाञ्चल भलिबल संघ, त्रिभुवन आर्मी क्लब र जावलाखेल भलिबल प्रशिक्षण केन्द्रका ६ टोलीको सहभागिता रहने छ ।
