दिपक बोहोरा
फिदिम– मन्त्री परिषद्ले भलिबललाई नेपालको राष्ट्रिय खेल घोषणा गरेको दुई साता नाघिसकेको छ । यस्तोमा जनस्तरबाट भलिबल राष्ट्रिय खेल भएकामा नकारात्मक टिप्पणी सुनिएको छैन । कम लगानी, नेपालको भौगोलि बनावट सुहाँउदो खेल र अन्य खेलको तुलनामा भलिबलको व्यापकतालाई नै राष्ट्रिय खेल घोषणा गरिनुको आधारका रुपमा प्रस्तुत गरिएको छ ।

राष्ट्रिय खेल भएपछि यसको गतिविधि, विकासको गति नेपाल भलिबल संघले ल्याउने नयाँ योजना त्यसको कार्यान्वयका लागि अझै केही समय त कुर्नुपर्नेनै हुन्छ । जनस्तरमा विरोधको स्वर नसुनिएपनि पाँचथरका भलिबलसँग सम्बन्धित व्यक्तिहरुको धारणा भने मिश्रित खालको पाइएको छ । केहीले यसलाई सकारात्मक रुपमा लिएका छन् भने केहीले खेलाडीको भविष्यसँग जोडेर हेरेका छन् ।

पाँचथर जिल्ला भलिबल संघका पदाधिकारी भने उत्साहित छन् । जिल्ला संघका अध्यक्ष महेन्द्र थापा लामो समयदेखि भलिबल राष्ट्रिय खेल घोषणा गरिदै आएको र अहिले त्यसको सुनावाई भएकोमा खुसी व्यक्त गर्छन् । यद्दपी पाँचथर जिल्ला भलिबल संघले स्थानिय रुपमा काम गर्न नसकेको भन्ने आलोचना पनि खेप्दै आएको छ ।

स्थानियस्तरमा अवस्था जे रहेपनि भलिबल राष्ट्रिय खेल घोषणा भएको खुसीयाली मनाउने योजनामा जिल्ला संघ रहेको छ । तर असार १४ गते स्थानिय निर्वाचन तोकिएकोले कार्यक्रम केही पछि सारिएको अध्यक्ष थापाले बताएका छन् ।
‘भलिबल राष्ट्रिय खेल घोषणा भएकोमा खुसी छौं,’ अध्यक्षले भने,‘ अब हामी प्रतियोगिता आयोजना पनि गर्नेछौं । प्रायोजकको खोजी गरि क्षेत्रिय स्तरको महिला र पुरुष भलिबल आयोजना गर्ने हाम्रो लक्ष्य छ ।’

पदाधिकारी जस्तो यहाँका खेलाडीमा भने उत्साह देखिदैनन् । पाँचौं देखि सातौं राष्ट्रिय खेलकुदसम्म पूर्वाञ्चलबाट भलिबल खेलेकी निलिमा आङदम्बे भबिल राष्ट्रिय खेल घोषणा भएपनि त्यसमा खेलाडी खुसी हुनु पर्ने कारण देख्दिनन् । ‘ न त भलिबलमा खेलाडीको भविष्य सुरक्षा छ । न यहाँ स्थानियस्तरमा कुनै प्रोत्साहन नै,’ उनले भनिन्,‘ जिल्ला संघ सुस्त भएपछि यहाँ खेलाडीले भविष्य देख्ने कुरा आउँदैन ।’

अर्का खेलाडी विक्रम राई पनि निलिमाको भनाईमा सहमत छन् । ‘ यहाँ भलिबलका लागि उपयुक्त वातावरण नै छैन,’ विक्रमले भने,‘राष्ट्रिय प्रतियोगिता हुने बेला मात्र खेलाडीको खोजी हुन्छ । अरु बेला कसैलाई वास्ता हुँदैन । अनि खेलाडी पलायन स्वभाविक हुन आउछ ।’

राष्ट्रिय खेल घोषणा भएपनि नेतृत्वको कार्यशैलीमा सुधार नआए खेलको विकास सम्भव नभएको पाँचथरको खेललाई नजिकबाट हेर्दै आएका सगुन सुसारा बताउँछन् । उनले थपे,‘ यहाँको संघनै निष्क्रिय छ । भलिबल प्रतियोगिता हुन्छ न संघको अधिवेशन नै । अनि यस्तो संघबाट के अपेक्षा राख्ने ?