काठमाडौँ (हाम्रो खेलकुद) – नेपालका प्रख्यात पर्वतारोही संजय पण्डितको पर्वतारोहणको क्रममा अमेरिकामा मृत्यु भएको छ। प्युठानमा जन्मिएका पण्डित अलास्काको माउन्ट डेनाली आरोहणका लागि अमेरिका पुगेका थिए।
नेपालका आधा दर्जन भन्दा बढी हिमाल चढिसकेका संजयको शुक्रबार शव फेला पारेको अलास्काको राष्ट्रिय निकुन्जले जनाएको छ। १७ हजार ५ सय फिट माथि शव फेला परेको तर मृत्युको कारण भने अझै पत्ता नलागेको श्रोतले जनाएको छ।
दुतावासमा उनको मृत्युको खबर आइसकेको र थप जानकारी शव प्राप्त भएपछि थाहा हुने दुतावासका प्रवक्ता जीवन प्रकाश श्रेष्ठले जनाए।
डेनाली राष्ट्रिय निकुन्जको टकिटना रेन्जर स्टेसनकि प्रवक्ता मौरिन गुआलटेरीले एक स्थानीय पत्रिकालाई उदृत गर्दै अन्तर्राष्ट्रिय पर्वतारोहीको मृत्यु भएको पुष्टि गरिन्। “रातको १ बजे १७ हजार ५०० फिटबाट ३ आरोहीले सहयोगको लागी खबर गरेका थिए। तर रेन्जर पट्रोल त्यहाँ पुग्दा शरीरले प्रतिक्रिया दिन छाडीसकेको थियो। रेन्जरहरुले स्वास्थ्य उपचार गरेपनि उनको ज्यान बच्न सकेन।”
खराब मौसमका कारण शव ल्याउन समस्या भइरहेको जानकारी गुआलटेरीले दिईन।
