काठमाडौ (हाम्रो खेलकुद) – नेपाली राष्ट्रिय भलिबल टोली र डेनमार्कको भिडओभ्र क्लबसँग आज मैत्रीपूर्ण खेल खेल्दैछ । नेपाल र डेनमार्कबीच सम्बन्ध स्थापनाको ५० बर्ष पुरा उपलक्ष्यमा राष्ट्रिय खेलकुद परिषद् (राखेप) को आयोजना र नेपाल भलिबल संघको संयोजनमा मैत्रीपूर्ण खेल हुन लागेको हो ।

नेपाली राष्ट्रिय भलिबल टोली टोली । फाइल तस्बिर

भलिबललाई जेठमा सरकारले राष्ट्रिय खेल घोषणा गरेको थियो । त्यसकै आसपासमा नेपाली टोलीले डेनमार्क पुगेर यहि टोलीसँग मैत्रीपूर्ण खेल खेलेको थियो । त्यति बेला नेपाल पाँच सेटमा पुगेर पराजित भएको थियो । केही महिना अघि मात्र पहिलो अन्तर्राष्ट्रिय पदक जित्नु र सरकारले भलिबललाई राष्ट्रिय खेलको मान्यता दिएसँगै भलिबल थप लोकप्रिय गर्दै गएको मानिएको छ ।

मैत्रीपूर्ण खेल नेपाली सेनाको लगनखेलस्थित कभर्ड हलमा दिनको दिउँसो १ः३० बजे सुरु हुने संघले जनाएको छ । आउने साता नेपाली टोलीले बंगलादेशको राष्ट्रिय टोलीसँग मैत्रीपूर्ण खेल खेल्दैछ । दुई खेल भदौको १३ र १४ गते सोही कभर्ड हलमा हुने संघले जनाएको छ । झन्डै एक महिना डेनिस प्रशिक्षक म्यान भान विजलले प्रशिक्षण दिएयता नेपाली टोली पहिलो पटक मैत्रीपूर्ण खेलमा उत्रदैछ । डेनिस प्रशिक्षक विजल भने केही दिनअघि स्वदेश फर्किसकेका छन् ।

राष्ट्रिय टोलीका प्रशिक्षक जगदिश भट्टले आजको खेलमा जितको आशा राखेका छन् । ‘यो टोलीसँग हाम्रो त्यति बेला निकै प्रतिस्पर्धात्मक खेल भएको थियो । पाँच सेटमा पुगेर हामी हारेका थियौं । त्यो टोलीमा भन्दा दुई तीन खेलाडी परिवर्तन भएको भन्ने जानकारी भएको छ’ उनले भने, ‘हामीले त्यति बेला भन्दा अहिले राम्रो तयारी गर्ने समय पाएका छौं । डेनिस प्रशिक्षक आएपछि हाम्रो प्रदर्शनमा थप सुधार भएको छ । आज जितको आशा गरेका छौं ।’

अन्तर्राष्ट्रिय भलिबल खेल्न थालेको झन्डै ४ दशक पछि नेपालले गत चैतमा इम रानाको कप्तानीमा तेस्रो एसियन सेन्ट्रल जोन सिनियर मेन्स च्याम्पियनसिपमा कास्य पदक जितेको थियो । त्यो नेपाली पुरुष टोलीको पहिलो अन्तर्राष्ट्रिय पदक हो ।