काठमाडौं (हाम्रो खेलकुद)–नेपाल र डेनमार्कबीच सम्बन्ध स्थापनाको ५० बर्ष पुरा भएको अवसरमा डेनिस क्लबसँग भएको मैत्रीपूर्ण भलिबलमा नेपाल विजयी भएको छ । लगनखेलस्थित सैनिक शारीरिक तथा प्रशिक्षण केन्द्रमा शनिबार भएको मैत्रीपूर्ण भलिबलमा नेपालले डेनमार्कको भिडओभ्र क्लबलाई ३–१ को सेटमा पराजित गरेको हो ।

पहिलो सेट १७–२५ ले गुमाएको राष्ट्रिय भलिबल टिमले त्यसपछिको तीनै सेट आफ्नो पक्षमा पार्दै जित निकालेको हो । दोस्रो सेट २५–१५ ले आफ्नो पक्षमा पारेको नेपालले त्यसपछि दुई सेट क्रमश: २५–२३ र २५–२३ ले जित्यो ।

नेपालले यसैसाता बंगलादेशको राष्ट्रिय टोलीसँग मैत्रीपूर्ण खेल खेल्दैछ । दुई खेल भदौ १३ र १४ गते सोही कभर्ड हलमा हुने नेपाल भलिबल संघले जनाएको छ । झन्डै एक महिना डेनिस प्रशिक्षक म्यान भान विजलले प्रशिक्षण दिएयता नेपाली टोली पहिलो पटक मैत्रीपूर्ण खेलमा उत्रदैछ । डेनिस प्रशिक्षक विजल भने केही दिनअघि स्वदेश फर्किसकेका छन् ।

नेपाल र डेनमार्कबीच सम्बन्ध स्थापनाको ५० बर्ष पुरा भएको उपलक्ष्यमा राष्ट्रिय खेलकुद परिषद् (राखेप) को आयोजना र नेपाल भलिबल संघको संयोजनमा मैत्रीपूर्ण खेल भएको हो । यसअघि नेपाली राष्ट्रिय भलिबल टोली डेनमार्क पुगेरै मैत्रीपूर्ण खेल खेलेको थियो । त्यतिबेला नेपाल पराजित भएको थियो ।

 

तिस्बरहरु-बिबेक सुवेदी/हाम्रो खेलकुद