हङकङमा मानबहादुर सम्मिलित घान्द्रुकलाई भलिबल उपाधि

काठमाडौं (हाम्रो खेलकुद)– हङकङमा नेपाली समुदायबीच हिजो भएको नवौं खुला भलिबल प्रतियोगितामा आयोजक घान्द्रुक समाज हङकङ विजयी भएको छ । नेपाली राष्ट्रिय भलिबल टोलीका सदस्य मानबहादुर श्रेष्ठले आयोजक टोलीलाई उपाधि दिलाउन मात्र मद्दत गरेनन् आफै प्रतियोगिताको सर्वोत्कृष्ट खेलाडी समेत बन्न सफल भए ।

आधिखोला हङकङलाई फाइनलमा सोझो सेटले हराउँदै घान्द्रुक च्याम्पियन बनेको हो । धान्द्रुक २५–१८,२५–२२,२५–२१ ले विजयी भएको थियो । आधि खोलाबाट अर्का राष्ट्रिय खेलाडी सुनिल श्रेष्ठ पनि खेलेका थिए । धान्द्रुकले त्यसअघि सेमिफाइनलमा सनसाइन क्लबलाई २५–१७,२५–१९,२८–२६ ले हराउँदै अन्तिम दुईको यात्रा तय गरेको थियो । सेमिफाइनलमा मानबहादुर म्यान अफ दी म्याच बनेका थिए । विजेता घान्द्रकुले १२ हजार २ सय २२ हङकङ डलर प्राप्त गरेको छ ।

हरेक वर्ष त्यहाँ नेपाली समुदायकाबीच भलिबल प्रतियोगिता हुँदा नेपाली भलिबल टोलीका एक खेलाडीलाई बोलाउने परम्परा अनुसार मानबहादुरलाई बोलाइएको थियो । माल्दिभ्सबाट फर्केको भोली पल्ट बिहीबार नै उनी हङकङ पुगेका थिए । उनी माल्सन स्पोर्टस क्लबबाट एसोसियन कप भलिबल च्याम्पियनसिप खेल्न उनी माल्दिभ्स पुगेका थिए ।