काठमाडौं (हाम्रो खेलकुद) – काठमाडौं नैकापको शिवम् न्यू डायमण्ड एकेडेमी राजधानीमा जारी प्रथम प्याब्सन यू–१८ भलिबल अन्तर्गत महिलातर्फको क्वार्टरफाइनलमा पुगेको छ । ढोरपाटन स्पोर्टस ट्रेनिङ सेन्टर नयाँ बसपार्कमा बुधबार दुई राष्ट्रिय खेलाडी प्रतिभा माली र कृपा अधिकारी सम्मिलित न्यू डायमण्डले थ्रीस्टार एकेडेमी २५–४ र २५–८ को सोझो सेटमा हरायो ।

थ्री स्टार एकेडेमीविरुद्ध सर्ट प्रहार गर्दै शिवम् न्यू डायमन्डकी प्रतिभा माली । तस्बिर- विवेक सुवेदी/हाम्रो खेलकुद

महिलातर्फकै अर्को खेलमा चितवनको मेधौली स्पोर्टस् एण्ड एजुकेशन क्लबले वाकओभर पाउदै अन्तिम आठमा पुग्न सफल भएको छ । मैधौलीले अब सेमिफाइनल प्रवेशका लागि न्यू डायमण्डको सामना गर्नेछ । महिलातर्फकै अर्को खेलमा प्यारामाउण्टले परोपकार आदर्श माबिलाई १७–२५, २५–१७ र २६–२४ ले हराएको थियो । प्यारामाउण्टले क्वाटर फाइनलमा भक्तपुरको स्प्रिङडेलसँग प्रतिस्पर्धा गर्नेछ ।

थ्रीस्टार एकेडेमी र ग्यासियर कलेज पुरुषतर्फको अन्तिम आठमा पुगेका छन् । बुढानिलकण्ठको थ्रीस्टारले झापा बिद्यालय भलिबल कमिसनलाई २५–२१ र २५–१४ ले हराउँदै क्वार्टरफाइनल यात्रा तय गरेको थियो । कोटेश्वरको ग्लासियर कलेजले धादिङको एड्भान्स एकेडेमीलाई २५–१० र ३१–२९ ले पराजित गर्यो ।

निजी तथा आवसिय बिद्यालय संगठन (प्याब्सन) को मुख्य प्रायोजनमा सञ्चालन भएको पुरुषतर्फकै खेलबाट सफलता निकाल्दै नुवाकोटको बुङताङ भलिबल टिम र सेक्रेटहार्ट पनि क्वार्टरफाइनलमा पुगे । बुङताङले धनुषाको बिनायक स्कुललाई २५–९ र २५–१५ ले तथा सेक्रेटहार्टले मोरङ बिद्यालय भलिबल कमिसनलाई २५–१५ र २५–१६ ले हरायो ।

नेपाल विद्यालय भलिबल कमिसनको आयोजना सञ्चालन भएको प्रतियोगिताको महिला र पुरुष दुवैको विजेता टोलिले उपाधिसहित १ लाख,दोस्रो हुनेले ६० हजार, तेस्रोले ३५ हजार रुपैयाँ प्राप्त गर्नेछन् । आइतबारसम्म चल्ने प्रतियोगिताको विधागत उत्कृष्ट खेलाडीले समान ५ हजार रुपैयाँ प्राप्त गर्नेछन् ।