काठमाडौं (हाम्रो खेलकुद) – प्रथम प्याब्सन यू–१८ राष्ट्रिय भलिबल प्रतियोगिताअन्तर्गत पुरुषतर्फ न्युटन हाइ स्कुल च्याम्पियन बनेको छ । नुवाकोटको बुङताङ भलिबल टोलीलाई सोझो तीन सेटमा हराउँदै न्युटन विजयी बनेको हो । अघिल्लो दिन न्यू डायमण्ड एकेडेमी महिलातर्फको च्याम्पियन बनेको थियो । 

नयाँ बसपार्कस्थित ढोरपाटन भलिबल प्रशिक्षण केन्द्रको खेल मैदानमा सोमबार भएको फाइनल न्युटनले ले २५–२०, २५–१७ र २५–१७ मा आफ्नो पक्षमा पारेको थियो । विजेता टोलीले उपाधि १ लाख र दोस्रो हुने टोलीले ६० हजार रुपैयाँँ प्राप्त गर्यो । थ्रीस्टार एकेडेमी काठमाडौं र कञ्चनपुरको लिटिल बुद्ध एकेडेमीले संयुक्त रुपमा तेस्रा भए र समान ३५ हजार रुपैयाँ प्राप्त गरे ।

प्रतियोगितामा न्युटन स्कुलका अजय सुनार सर्वोत्कृष्ट खेलाडी घोषित भए र उनले ५ हजार रुपैयाँ पाए । बुङताङका आसिस मगर उत्कृष्ट स्पाइकर, न्युटनका छामकुमार कुँवर उत्कृष्ट सेटर, न्युटनकै हरि घर्तीमगर उत्कृष्ट ब्लकर, न्युटनकै ओमप्रसाद घिमिरे उत्कृष्ट सर्भर र बुङताङकै जहिल तामाङ उत्कृष्ट डिफेन्डर घोािषत भए । उत्कृष्टले जनही ३ हजार हात पारे ।

नेपाल बिद्यालय भलिबल कमिसनको आयोजना भएको प्रतियोगिताका विजेता, दोस्रो र तेस्रो हुने टोलीलाई नेपाल भलिबल संघका अध्यक्ष मनोरञ्जनरमन शर्मा, सचिव जगदिश भट्ट, आयोजक कमिसनका अध्यक्ष रामबहादुर केसीलगायतले पुरस्कृत गरे ।

निजी तथा आवासीय विद्यालय अर्गनाइजेसन (प्याब्सन) को मुख्य प्रायोजनमा आयोजित प्रतियोगितामा महिलातर्फ १६ र पुरुषतर्फ २३ टोलीको सहभागिता थियो । कात्तिक १२ गतेदेखि सुरु भएको प्रतियोगितामा उत्कृष्ट प्रदर्शन गर्ने खेलाडी मध्ये २४ महिला र २४ पुरुष खेलाडी पहिलो चरणमा छनोट गरिने बताइएइको छ । त्यसमध्येबाट छनोट गरि यू–१८ को राष्ट्रिय टोली तयार गरिने नेपाल भलिबल संघले जनाएको छ ।