अर्जुन कार्की
बागलुङ– छन्त्याल कन्ट्रक्सनले बागलुङमा खुला पुरुष भलिबल प्रतियोगिताको उपाधि जितेको छ ।पाँचौं बागलुङ महोत्सवको मुख्य आकर्षण मध्ये एकका रुपमा रहेको पुरुष भलिबलको फाइनलमा आज पश्चिमाञ्चल क्षेत्रिय भलिबल संघ कास्कीलाई ३–० को सोझो सेटमा हराउँदै छन्त्यालले उपाधि जितेको हो ।
छन्त्याल कन्ट्रक्सनले २५–२१, २७–२५ र २५–२१ को नतिजा निकालेको थियो । पश्चिमाञ्चलले फाइनल अघि कुनै खेल हारेको थिएन। उपाधिसहित छन्त्यालले १ लाख १ हजार १ सय ११ तथा पश्चिमाञ्चलले ५५ हजार ५ सय ५५ रुपैयाँ प्राप्त ग¥यो । छन्त्याललाई फाइनल जिताउन उत्कृष्ट खेल प्रदर्शन गरेका अनिल थापा उत्कृष्ट खेलाडी घोषित हुँदै ५ हजार रुपैयाँ प्राप्त गरे ।
प्रतियोगितामा नेपाली सेनाको २३ नम्बर बाहिनी अड्डा तेस्रो भयो । २३ नम्बर बाहिनी अड्डाले गल्कोट नगरपालिकालाई २५–२२, २५–१६ र २५–२३ को सोझो सेटमा हराएको थियो । बाहिनीले २० हजार ५ सय ५५ रुपैयाँ प्राप्त ग¥यो । महिला भलिबल हिजो सम्पन्न भएको थियो । उद्योग बाणिज्य संघ बागलुङको आयोजनामा पुस १४ देखि सुरु भएको महोत्सव २३ गतेसम्म संचालन हुनेछ ।
