काठमाडौं (हाम्रो खेलकुद) – तीन मैत्रीपूर्ण खेलको लागि नेपाली राष्ट्रिय पुरुष भलिबल टोली बिहिबार हङकङ प्रस्थान गर्ने भएको छ ।

२१ सदस्यीय नेपाली भलिबल टोलीलाई प्रतिनिधि सभा सदस्य तथा नेपाल ओलम्पिक कमिटिका अध्यक्ष जीवनराम श्रेष्ठले बुधबार एक कार्यक्रमका बीच विदाई गरे । टोली बिहिबार हङकङ प्रस्थान गर्नेछ । इम बहादुर मगरको कप्तानीमा नेपाली टिमले माघ १४ र १५ गते हङकङको राष्ट्रिय टिमसँग दुई मैत्रीपूर्ण खेल खेल्नेछ । त्यस्तै मकाउको राष्ट्रिय टिमसँग माघ १७ गते मैत्रीपूर्ण खेल खेल्ने कार्यक्रम रहेको छ ।

नेपाल भलिबल संघका अध्यक्ष मनोरञ्जनरमण शर्माको नेतृत्वमा बिहिबार त्यसतर्फ प्रस्थान गर्ने नेपाली टोली २१ सदस्यको रहेको छ । ओपन स्पाईकरमा मानवहादुर श्रेष्ठ, कुलवहादुर थापा, धनवहादुर भट्ट र दिलवहादुर सुनार रहेका छन् । हरिवहादुर अधिकारी, महेन्द्र श्रेष्ठ र भैरब बमले क्वीक स्पाईकरको भूमिका निर्वाह गर्नेछन् । टोलीमा अलराउण्डरको भूमिकामा राजकुमार निरौला र नरेन्द्र गिरी रहेका छन् । लिब्रो (डिफेन्स) को भूमिकामा इश्वर थापा रहँदा सहायक सेटरको जिम्मेवारी दुर्गाप्रसाद महत्तोले निभाउनेछन् ।

नेपाल भलिबल संघका अध्यक्ष शर्माका साथमा महासचिव जितेन्द्रबहादुर चन्द र विद्यालय भलिबल कमिसनका उपाध्यक्ष युवराज श्रेष्ठ पनि टोलीका सदस्य हुन् । उनीहरुले नेपाली भलिबलको बिकास र बिस्तारमा दुई देश बीच सहयोग आदन–प्रदानका लागि हङकङ र मकाउका भलिबलका उच्चपदाधिकारीसँग महत्वपुर्ण छलफल गर्ने कार्यक्रम रहेको छ ।

नेपाली टोलीमा बिरेन्द्र चौधरी मुख्य प्रशिक्षकको भूमिकामा रहँदा सहायक प्रशिक्षकमा जगदिश भट्ट रहनेछन् । टिम ब्यवस्थापको रुपमा नेपाल भलिबल संघका सदस्य राजकुमार गुरुङ रहेका छन् । टोलीसँगै रेफ्रीको भूमिकामा एशियन रेफ्रि क्यानिडेड पुर्णप्रसाद चौलागाई पनि साथमा रहने छन् । नेपाली टिममा दुई खेल पत्रकार पनि त्यसतर्फ जाँदैछन् ।