काठमाडौं (हाम्रो खेलकुद) – नेपाली राष्ट्रिय पुरुष भलिबल टोली हङकङ पुगेको छ। तीन मैत्रीपूर्ण खेलको लागि नेपाली राष्ट्रिय पुरुष भलिबल टोली आज बिहान हङकङतर्फ प्रस्थान गरेको थियो।
तस्विर सौजन्य: एनएसजेएफ
नेपाल भलिबल संघका अध्यक्ष मनोरञ्जनरमण शर्माको नेतृत्वमा बिहान त्यसतर्फ प्रस्थान गरेको नेपाली टोली २१ सदस्यको रहेको छ । ओपन स्पाईकरमा मानवहादुर श्रेष्ठ, कुलवहादुर थापा, धनवहादुर भट्ट र दिलवहादुर सुनार रहेका छन् । हरिवहादुर अधिकारी, महेन्द्र श्रेष्ठ र भैरब बमले क्वीक स्पाईकरको भूमिका निर्वाह गर्नेछन् । टोलीमा अलराउण्डरको भूमिकामा राजकुमार निरौला र नरेन्द्र गिरी रहेका छन् । लिब्रो (डिफेन्स) को भूमिकामा इश्वर थापा रहँदा सहायक सेटरको जिम्मेवारी दुर्गाप्रसाद महत्तोले निभाउनेछन् ।
नेपाली टोलीमा बिरेन्द्र चौधरी मुख्य प्रशिक्षकको भूमिकामा रहँदा सहायक प्रशिक्षकमा जगदिश भट्ट रहेकाछन् । टिम ब्यवस्थापको रुपमा नेपाल भलिबल संघका सदस्य राजकुमार गुरुङ रहेका छन् । टोलीसँगै रेफ्रीको भूमिकामा एशियन रेफ्रि क्यानिडेड पुर्णप्रसाद चौलागाई पनि साथमा रहेका छन् । नेपाली टिममा दुई खेल पत्रकार पनि त्यसतर्फ गएका छन् ।
