काठमाडौं (हाम्रो खेलकुद) – विभागीय नेपाल एपिएफ क्लबले ‘रेडबुल ढोरपाटन युएम महिला डबल लिग भलिबल’ प्रतियोगिताको शीर्ष स्थानमा रहेको शिवम् न्यु डायमण्ड एकेडेमीमाथि रोमाञ्चक जित निकालेको छ ।
नयाँ बसपार्कस्थित ढोरपाटन भलिबल क्लबको खेल मैदानमा सोमबार भएको रोमाञ्चक खेलमा एपीएफले न्यु डायमण्डमाथि ३–२ को रोमाञ्चक जित निकाल्यो । प्रतिस्पर्धात्मक बनेको खेलमा एपीएफले पहिलो सेट २५–२० ले आफ्नो पक्षमा पारेको थियो ।
दोस्रो सेटमा उत्कृष्ट प्रदर्शन गरेको न्यु डायमण्डले एपीएफलाई २५–१३ मा रोक्दै खेललाई १–१ को बराबरीमा ल्याएका थिए । तेस्रो सेटमा एपीएफले २५–२१ ले आफ्नो पक्षमा पार्दा चौथो सेट डायमण्डले २५–२३ ले जित्दै खेललाई २–२ को स्थितिमा ल्याएका थिए ।
निर्णायक सेटमा डायमण्डले अग्रता लिएर पनि १५–१२ ले खेल गुमाएपछि एपीएफले डायमण्डमाथि रोमाञ्चक जित निकाल्न सफल भयो । हारपछि पनि डायमण्ड ३१ अंकसहित लिगको शीर्ष स्थानमा यथावत रहेको छ । एक खेल कम खेलेको एपीएफको १० खेलबाट २९ अंक पुगेको छ । पहिलो लिगको अन्तिम खेलमा एपीएफले मंगलबार त्रिभुवन आर्मी क्लबसँग खेल्नेछ ।
