काठमाडौं (हाम्रो खेलकुद)– नेपालले अर्को वर्षको एभिसी सेन्ट्रल जोन पुरुष भलिबल च्याम्पियनसिप आयोजना गर्ने भएको छ । एसियाली भलिबल महासंघ (एभिसी) सेन्ट्रल जोनको सोमबार माल्दिभ्समा बसेको बैठकले नेपाललाई आयोजनाको जिम्मेवारी दिएको नेपाल भलिबल संघका महासचिव जितेन्द्रबहादुर चन्दले जानकारी दिएका छन् । उनका अनुसार नेपालले सन् २०१९ को नोभेम्बर देखि डिसेम्बर भित्रमा च्याम्पियनसिप आयोजना गर्नेपर्नेछ ।

नेपालले यसअघि पनि च्याम्पियनसिप आयोजनाको जिम्मेवारीको दाबी गरेपछि पाँचौं संस्करणमा आएर मौका पाएको छ । नेपालमा आयोजना हुने त्यो प्रतियोगिता अहिले सम्मकै ठूलो प्रतियोगिता हुने पनि माल्दिभ्सबाट संघका महासचिव चन्दले हाम्रो खेलकुदलाई जानकारी गराए । पछिल्लो केहि वर्षयता अन्तर्राष्ट्रिय भलिबलमा लगातार सहभागिता जनाउँदै आएको नेपालले गत वर्ष माल्दिभ्समा भएको तेस्रो एभिसी सेन्ट्रल जोन च्याम्पियनसिपमा कास्य पदक जितेको थियो ।

चार दशक लामो अन्तर्राष्ट्रिय यात्रामा नेपालले जितेको त्यो पहिलो अन्तर्राष्ट्रिय पदक हो । यसै वर्ष नेपाल सरकारले भलिबललाई राष्ट्रिय खेलको मान्यता दिएको छ । यो हाम्रो लागि ठूलो अवसर हो ।’ नेपालको भलिबल एसियाली मुलुकमका चिनाउने पनि एउटा अवसर हो,’ चन्दले भने, ‘हामी त्यो च्याम्पियनसिपलाई जतिसक्दो राम्रो गर्ने प्रयास गर्नेछौं ।’ बैठकमा भाग लिन महासचिव चन्दसँगै सचिव मनवीर छन्त्याल पनि माल्दिभ्स पुगेका छन् ।

सेन्ट्रल जोनमा एसियाका १४ राष्ट्र छन् । त्यसमा पनि ५ राष्ट्र ए र बाँकी ९ राष्ट्र बी श्रेणीमा छन् । नेपालसहित माल्दिभ्स, अफगानिस्तान, भुटान, बंगलादेश, तुर्किमिनिस्तान, ताजकिस्तान, कीर्गिस्तान र उज्वेकिस्तान बी श्रेणीमा छन् । भारत, पाकिस्तान, श्रीलंका, काजकिस्तान र इरान ए श्रेणीमा छन् ।

एभिसी सेन्ट्रल जोनका ३ मध्ये २ प्रतियोगिता बंगलदेश र बाँकी एक माल्दिभ्सले आयोजना गरेको थियो । सन् २०१५ र २०१६ बंगलादेश र २०१७ को माल्दिभ्सले आयोजना गरेको थियो । अप्रिल २० देखि हुने चौथो संस्करण पनि बंगलादेशले आयोजना गर्दैछ । जसका लागि नेपाली टोलीले पनि तयारी सुरु गरिसकेको छ ।