काठमाडौं (हाम्रो खेलकुद) – नेपाल आर्मी क्लबलाई ३-१ ले पराजित गर्दै नेपाल पुलिस क्लब चौथो केएनपी राष्ट्रिय महिला भलिबल प्रतियोगिताको सेमिफाइनलमा प्रवेश गरेको छ। समूह ‘बी’ को दुवै खेल जित्दै पुलिस समूह विजेताको रुपमा सेमिफाइनल पुगेको हो। 

आर्मी विरुद्ध रोमाञ्चक खेलमा पहिलो सेटमा पराजित भएको पुलिसले पछिल्लो तीन सेटमा जित हासिल गरेको थियो। निकैनै प्रतिस्पर्धात्मक पहिलो सेटमा पुलिस २५-२३ ले पराजित भएको थियो। पछिल्लो तीन सेट २५-२०, २५-१६ र २५-१९ ले विजयी हुँदै पुलिसले समूहमा दोस्रो जित हासिल गर्यो। हिजो भएको पहिलो खेलमा अघिल्लो संस्करणको उपविजेता शिवम् न्यु डायमण्डलाई ३-१ ले पराजित गर्दै प्रतियोगितामा विजयी सुरुआत गरेको थियो।

आजै भएको पहिलो खेलमा नेपाल एपिएफले पश्चिमाञ्चल भलिबल टोलीलाई ३-० को सोझो सेटमा पराजित गर्दै सेमिफाइनलमा स्थान बनाउन सफल भएको थियो। 

शेरबहादुर खड्का स्मृति प्रतिष्ठानले आयोजना गरेको प्रतियोगिता अन्तर्गत भोली समूह चरणको बाँकी दुई खेल हुनेछन्। पहिलो खेलमा ११ बजे शिवम् न्यु डायमण्डले आर्मीको सामना गर्नेछ भने दोस्रो खेलमा १:३० बजे पश्चिमाञ्चलले जावलाखेल भलिबल प्रशिक्षण केन्द्रको सामना गर्नेछ। दुवै खेलको विजेताले समिफाइनलमा स्थान बनाउने छ। खेल हाम्रोखेलकुद डट कमको फेसबुकबाट प्रत्यक्ष आउने छ।

तीन विभागीय टोलीसहित न्यु डायमण्ड एकेडेमी, पश्चिमाञ्चल भलिबल टोली र जावलाखेल भलिबल प्रशिक्षण केन्द्रको सहभागिता रहेको यस प्रतियोगिताको फाइनल बैशाख २५ गते हुनेछ। प्रतियोगितामा उत्कृष्ट प्रदर्शन गर्ने खेलाडीलाई ‘केएनपी सर्वोकृष्ट खेलाडी’ को उपाधि सहित १० हजार रुपैयाँ प्रदान गरिनेछ ।

विधागत उत्कृष्टतर्फ ‘शिवम् सिमेन्ट वेष्ट स्पाईकर’, ‘शिवम् सिमेन्ट वेष्ट डिफेन्स’ र ‘शिवम् सिमेन्ट वेष्ट ब्लकर’ को उपाधिबाट एक–एक खेलाडीलाई ५ हजार रुपैयाँसहित पुरस्कृत गरिनेछ ।

प्रतियोगिताको विजेताले १ लाख ५० हजार, उपविजेताले १ लाख र तेस्रो हुने टोलीले ५० हजार पुरस्कार पाउनेछन्। त्यस्तै उत्कृष्ट खेलाडीले १० हजार र विधागततर्फ उत्कृष्ट ७ जनाले जनही ५ हजार पुरस्कार पाउनेछन्। प्रतियोगिताको वजेट १८ लाख रहेको छ।