गुहावटी, माघ २३ । १२औं दक्षिण एसियाली खेलकुद साग अन्र्तगत नेपालले दोस्रो दिन शनिबार दुई कास्य र एक रजत जित्न सफल भएको छ ।
सागअन्तर्गत कुस्तीमा एक कास्य तथा भारत्तोलनमा १ रजत र १ कांस्य जितेको छ । नेपालले पुरुषमा रजत र महिलामा कांस्य जित्यो ।
पुरुषको ६२ केजीमा विकास थापाले नेपाललाई रजत दिलाए । उनले स्न्याचमा १ सय १२ र क्लिन एन्ड जर्कमा १ सय
३० गरी कूल २ सय ४२ केजी भार वहन गरे । जम्मा २ सय ६५ केजी भार उचालेका श्रीलंकाली खेलाडीले स्वर्ण हात पारे ।
महिलाको ५३ केजीमा देवीकुमारी चौधरीले कांस्य हात पार्ने क्रममा स्न्याचतर्फ ५४ र क्लिन एन्ड जर्कमा ७५ गरी जम्मा १ सय २९ केजी वजन उठाइन् ।
यस्तै पुरुष कुस्तीको ६५ केजीमा नेपालका सरोज यादवले कांस्य जिते ।
महिला भलिबलमा नेपाल सेमिफाइनलमा
भारतको गुवाहटीमा भइरहेको १२ औं दक्षिण एसियाली खेलकुद (साग) अन्तर्गत महिला भलिबलमा नेपाल शनिबार सेमिफाइनलमा प्रवेश गरेको छ ।
नेपाल अफ्गानिस्तानबाट वाक ओभर पाउदै समूह ‘क’ को उपविजेता हुँदै सेमिफाइनलमा पुगेको हो । अघिल्लो दिन नेपाल श्रीलंकासंग ३–० ले पराजित भएको थियो ।
उक्त समूहमा पुरुषमा समूह ‘ए’ को लिग खेलमा भारतले नेपाललाई ३–० ले हरायो । नेपाल २५–१५, २५–१६ र २५–१५ ले चुक्यो । नेपाल रहेको समूहमा श्रीलंका र पाकिस्तान छन् ।
