धनकुटा (हाम्रो खेलकुद) – धनकुटाको चौविसे गाउपालिकामा सञ्चालित प्रदेश स्तरीय प्रथम सगरमाथा कप पुरुष भलिबल प्रतियोगीतामा सुनसरीले फाईनलमा ओखलढुंगालाई १६–२५,२०–२५,२५–२७,१९–२५ र ९–१५ हराएको छ ।

जीतसंगै सुनसरीले नगद ५० हजार सहित मेडल, प्रमाणपत्र र टफी हात पारेको छ भने दोश्रो भएको ओखलढुंगाले नगद रु ३० हजार सहित प्रमाण पत्र, मेडल र ट्रफि हात पारेको छ । त्यस्तै प्रतियोगितामा तेश्रो भएको भोपुरले नगद रु २० हजार प्रमाण पत्र, मेडल र ट्रफि हात पारेको आयोजकले जनाएको छ ।

प्रतियोगिताको उत्कृष्ट स्पाईकर सुनसरीका विवश लिम्वु, उत्कृष्ट सटर भोजपुरका जमन उदास, उत्कृष्ट डिफेन्डर ओखलढुंगाका दिलिप राई, उत्कृष्ट सेटर ओखलढुंगाकै सञ्जय वुढाथोकी, उत्कृष्ट ब्लकर सुनसरीका सूरज चौधरी तथा सर्वोत्कृष्ठ खेलाडी भोजपुरका संजिव कट्टेल घोषित भएका छन् ।

सामाजिक विकास मन्त्रालय १ नम्बर प्रदेशको आयोजनामा तथा चौबिसे गाँउपालिकाको सह-आयोजनामा भएको प्रतियोगिता समापन कार्यक्रममा सामाजिक विकास मन्त्री जीवन घिमिरेले प्रदेश नं १ मा खेललाई उच्च प्राथामिकतामा राखेर खेल पर्यटन प्रवर्द्धनमा जोड दिईने बताए ।

जिल्ला खेलकुद विकास समितिका अध्यक्ष भोगेन्द्र थापाको अध्यक्षतामा भएको कार्यक्रममा विशिष्ट अतिथि प्रदेश सभाषद निरन राई, विना राई, सावित्रा जोशी, उनिता विक लगायतको उपस्थिती थियो ।