काठमाडौं (हाम्रो खेलकुद) – नेपाल ओलम्पिक कमिटी (एनओसी)को निर्वाचन भदौ २८ गते शनिबार हुने भएको छ ।

सर्वाेच्चकै निर्णयका आधारमा मान्यता पाएको रुक्म शम्सेर राणा अध्यक्ष रहेको एनओसीका सदस्य कमलबहादुर चित्रकारले एनओसीको निर्वाचन रोक्नमा माग गर्दै १७ भदौमा आइतबार रिट दायर गरेपछि २० भदौलाई तय भएको निर्वाचन स्थगित भएको थियो । २२ भदौ आफ्नै अन्तरिम आदेशलाई सर्वाेच्च अदालतले खारेज गरेपछि एनओसीको नयाँ कार्यसमितिको चयनका लागि बाटो खुलेको थियो । आइतबार न्यायाधीश तेजबहादुर केसी र मनोजकुमार शर्माको इजलासले दुवै पक्षको बहस सुनेपछि चुनाव अन्तरिम आदेशलाई निरन्तरता दिन नपर्ने निर्यण गरेका थिए ।

त्यसपछि अन्तर्राष्ट्रिय ओलम्पिक परिषद् (आइओसी) र ओलम्पिक काउन्सिल अफ एसिया (ओसिए) सँगको परामर्शपछि निर्वाचनको नयाँ मिति तय गरिएको एनओसी अध्यक्ष जीवनराम श्रेष्ठले जारी गरेको प्रेस विज्ञप्तिमा उल्लेख छ । एनओसीको अध्यक्षका लागि वर्तमान अध्यक्ष जीवनराम श्रेष्ठ र पूर्व उपाध्यक्ष उमेशलाल श्रेष्ठबीच प्रतिस्पर्धा हुँदैछ ।

महासचिवमा जीवनराम पक्षबाट निलेन्द्रराज श्रेष्ठ र उमेशलालको पक्षबाट पुरेन्द्रविक्रम लाखेको उम्मेदवारी परेको छ । २७ जना प्रतिनिधि रहेको एनओसीमा २६ जनाले उम्मेदवारी दिएका छन् । जसमा कोषाध्यक्ष रतन टण्डन र उप महासचिवमा पिताम्बर तिम्सिना निर्वारोध भइसकेका छन् । शनिबार हुने निर्वाचनले १ अध्यक्ष, ५ उपाध्यक्ष, १ महासचिव, ३ सचिव र ७ सदस्य चयन गर्नेछ । निर्वाचन अन्तर्राष्ट्रिय ओलम्पिक परिषद् (आइओसी) र ओलम्पिक काउन्सिल अफ एसिया (ओसिए) कै रोहवरमा हुनेछ ।