काठमाडौं (काठमाडौं) – दक्षिण एसियाली खेलकुद (साग) को अर्को संस्करण पाकिस्तानमा आयोजना हुने निर्णय भएको छ । दक्षिण एसियाली ओलम्पिक काउन्सिल (एसएओसी) को सोमबार बसेको बैठकले सागको १४ औं संस्करण पाकिस्तानमा आयोजन गर्ने सर्वसम्मत निर्णय भएको नेपाल ओलम्पिक कमिटी (एनओसी) ले प्रेस विज्ञप्ती जारी गरेको छ ।
बैठक एसएओसी अध्यक्ष जीवनराम श्रेष्ठको अध्यक्षतामा बसेको थियो । संघिय सांसद समेत रहेका श्रेष्ठ एनओसीका अध्यक्ष हुन् । सागको १४ औं संस्करण सन् २०२१ मा गर्ने भएतापनि अबको ६ महिनापछि पाकिस्तानमा बस्ने बैठकले सागको मिति तोक्ने निर्णय गरिएको छ ।
गत महिना काठमाडौंमा आयोजना भएको एसओएसी बैठकले पाकिस्तानलाई आयोजनाको जिम्मा दिने र छ महिना भित्र मिति तय गर्न नसक्दा श्रीलंका र माल्दिभ्सलाई संयुक्त आयोजनाको जिम्मा दिने निर्णय गरेको थियो ।
त्यसैगरी, एसओएसीको अर्को बैठक नेपालमा नै आयोजना गर्ने निर्णय भएको एनओसी अध्यक्ष श्रेष्ठले बताए । नेपालमा जारी १३औं साग सफलताका साथ सम्पन्न हुने क्रममा रहेको भन्दै एसओसीएलें साग आयोजक समिति, नेपाल सरकार, तथा दक्षिण एसिायका सबै राष्ट्रिय ओलम्पिक कमिटीलाई धन्यवाद ज्ञापनसमेत गरेको छ ।
