काठमाडौं (हाम्रो खेलकुद) – विभागीय टोली त्रिभुवन आर्मी क्लब र नयाँबजार सामाजिक युवा क्बल (एनवाईसी) पाँचौ आरबीबी-एनभीए राष्ट्रिय महिला तथा पुरुष भलिबल क्लब च्याम्पियनसिप २०७६ अन्तर्गत पुरुषतर्फ क्वाटरफाइनलमा प्रवेश गरेका छन् ।

पुरुषतर्फ शनिबार भएको खेलमा नयाँबजारले आरजी भलिबल ग्रुप (आरजीजी) लाई ३–० को सोझो सेटमा पराजित गरेको हो । नयाँबजारले आरजीजीमाथि २५–२०, २५–१६ र २५–१८ को सोझो सेटमा जित निकाल्न सफल भयो । यस जितसँगै १-१ जित दर्ता गरेका आर्मी र नयाँबजार क्वाटरफाइनलमा प्रवेश गरेका हुन् । पहिलो दिनको खेलमा आर्मीसँग सोझो सेटमा हारेको आरजीजी भने प्रतियोगिताबाट बाहिरिएको छ ।

पुरुषतर्फ भने नेपाल पुलिस क्लबले पार्वती भलिबल क्लब (पिभिसी) बाट वाक ओभर पायो । त्यसअघि महिलातर्फ समूह ए को खेलमा आर्मीले भरतपुलिाई २५–८,२५–२० र २५–१० मा हरायो । अर्को खेलमा साविक विजेता एपीएफले जावलाखेल भलिबल प्रशिक्षण केन्द्रलाई २५–४,२५–८ र २५–८ ले हराएको थियो ।

प्रतियोगिताको तेस्रो दिन पुरुषतर्फ दुई र महिलातर्फ पनि २ खेल हुनेछ । महिलातर्फ एपीएफ र बीएमसी तथा जावलाखेल र आर्मीबीच खेल हुनेछ । पुरुषमा पार्वती भलिबल क्लब र मणिमुकुन्द भलिबल क्लब तथा हेल्प नेपाल र बुद्धटोल युवा भलिबलकलबबीच खेल हुनेछ ।

त्रिपुरेश्वरस्थित राष्ट्रिय खेलकुद परिषद् (राखेप) कभर्ड हलमा जारी च्याम्पियनसिपमा पुरुषतर्फ ११ र महिलातर्फ ७ टोलीको सहभागिता रहेको छ । पुरुषतर्फको समूह एमा साविक विजेता त्रिभुवन आर्मी क्लब, आरजी भलिबल ग्रुप र नयाँ बजार सामाजिक क्लब छन् ।

एपिएफ, बुलबुले रारा क्लब र जावलाखेल भलिबल प्रशिक्ष केन्द्र समूह ‘बी’ तथा नेपाल पुलिस क्लब , मणिमुकुन्द भलिबल क्लब र पार्वती भलिबल क्लब समूह ‘सी’ मा छन् । राउन्ड रोविन लिगपछि समूहका शीर्ष दुई टोली क्वार्टरफाइनलमा पुग्नेछन् । महिलातर्फ दुई विभागिय टोली साविक विजेता नेपाल एपिएफ क्लब, आर्मी, जावलाखेल र भरतपुर महानगर समूह ‘ए’ तथा न्यु डायमण्ड स्पोर्टस क्लब, पुलिस र ढोरपाटन स्पोर्टस्स क्लब छन् । राउन्ड रोविनपछि समूहका शीर्ष दुई टोली सेमिफाइनल पुग्नेछन् ।

प्रतियोगिताका दुवैतर्फका विजेताले २ लाख, दोस्रो हुने टोलीले १ लाख र तेस्रो टोलीले ५० हजार रुपैयाँ प्राप्त गर्नेछ । त्यस्तै दुवैतर्फका सर्वोत्कृष्ट खेलाडीले समान २५ हजार पाउनेछन् । विधागत उत्कृष्टले समान १० हजार रुपैयाँ पाउनेछन् । माघ १० गते सम्म चल्ने प्रतियोगिताका सहभागी टोलीले ३ जना सम्म विदेशी खेलाडी राख्न पाउने प्रावधान छ । राष्ट्रिय वाणिज्य बैंकको मुख्य प्रायोजना हुने क्लब च्याम्पियनसिपको यो पाँचौं संस्करण हो ।