सुबास हुमागाईं, धरान

भनिन्छ १२ वर्षपछि बगेको खोला फर्कन्छ । ४७ वर्षीय बलभद्र राई (मणि) को खेल जीवनमा पनि करीअरको दोस्रो उपाधि जित्न १२ वर्ष नै प्रतीक्षा गर्नुपर्यो । सन् २००८-०९ को टुरमा वेस्टर्न ओपनको उपाधि जितेपछि बिहीबार धरानस्थित निर्भाना कन्ट्री क्लबको घरेलु कोर्षमा इस्टर्न ओपन जित्दै मणिले लामो प्रतिक्षा तोडे । झन्डै ३ दशक लामो गल्फ करीअरमा उनले घरेलु कोर्षमा उपाधि जित्ने सपना अन्तत: पूरा गरेका छन् ।

लाहुरे बन्ने लक्ष्य लिएर मणि वि.सं २०४५ सालमा धरानको ब्रिटिस क्याम्पमा प्रवेश गरेका थिए । उमेरका युवाहरु त्यसबेला लाहुरेमा भर्ति हुने लहड चलेको बेलामा उनी पनि अछुतो रहेनन् । त्यसबेला उनले क्याम्पभित्र रहेर डेढ वर्षसम्म लगातार क्याडी ब्वाई बने । बेलाबखत आफैं पनि क्लब समातेर हान्न थालेका उनी डेढ वर्षपछि क्याम्प बन्द भएपछि गल्फबाट टाढिए । मणिले गल्फ छाडेपनि उनी त्यसै रहन सकेनन् ।

झन्डै ७ वर्षपछि उनले निर्भाना कन्ट्री क्लबमा मेम्बरसिप नै लिएर गल्फ यात्रालाई पुनर्जीवन दिए । यसबीचमा विवाह बन्धनमा बाधिएँ पनि । सन् १९९७ देखि नियमित गल्फमा होमिएका उनले १९९९ को सुर्य नेपाल मास्टर्सको एमेच्योरतर्फ नेटतर्फ उपाधि जिते । काठमाडौंमा टुर अन्तर्गत प्रतियोगिता खेल्न जान थालेपछि उनलाई झन् गल्फप्रतिको लगाव बढ्न थाल्यो । विशेषगरी गोकर्णको कोर्षले उनलाई गल्फप्रति आकर्षण गरेको थियो । गल्फबाट उनले व्यक्तिगत रुपमा पनि धेरै राम्रो मान्छे चिनेको बताउँछन् ।

सामान्यतया उपत्यकाबाहिर खेल्ने व्यावसायिक गल्फर आफ्नो क्षेत्रको प्रतियोगितामा मात्र सहभागिता जनाउँछन् । मणि भने व्यावसायिक टुरको हरेक प्रतियोगितामा सहभागिता जनाउन पश्चिम पोखरा होस् या काठमाडौं, आएकै हुन्छन् । लगातार अपेक्षित नतिजा हासिल नगर्दा पनि उनले विश्राम लिनेबारे सोचेनन् । उनी नेपालमा गल्फको विकासका लागि नै आफ्नो स्तरबाट सक्दो सहयोग गर्ने हिसाबले यो कदम चालेको बताउँछन् ।

‘ नेपालमा सूर्य नेपालको प्रायोजनको कारण नै एनपीजीएले यसरी निरन्तर रुपमा व्यावसायिक गल्फरको लागि टुर आयोजना गरेको छ । यसले समग्र नेपाली गल्फको नै उत्थान गरेको छ । म आफैंले त यसका लागि हरपल आफ्नो स्तरबाट साथ दिनै पर्छ, साथसाथै अन्य गल्फरलाई पनि प्रतियोगितामा सहभागी भएर सहयोग गर्न अनुरोध गर्दछु,’ उनले भने ।

‘ प्रो कार्ड लिने ६० को हाराहारीमा भएपनि सहभागिता त्यसैअनुसार हुन सकेको छैन । हरेक ठाउँमा भएको गल्फ खेल्नुपर्छ । मैले पनि काठमाडौं जाँदा आर्थिक रुपमा घाटा हुन्छ सोचेको भए सायद खेल्दिनथें होला । तर हामीले त्यसरी हेर्नु हुँदैन । गल्फको लागि लगानी गर्नेलाई प्रोत्साहन गर्नकै लागि पनि उल्लेख्य सहभागिता जनाउनुपर्छ,’ उनले थपे, ‘ मेरो शरीरले साथ दियो भने अझैपनि १० वर्षसम्म टुर खेल्ने आशा छ ।’

नेपालले गत महिना मात्र दक्षिण एसियाली खेलकुद (साग) मा गल्फतर्फ टिम इभेन्टमा स्वर्ण पदक जित्दा ३ खेलाडी सुनसरी जिल्लाकै थिए । त्यसमध्य शुक्रबहादुर राई र निरज तामाङले मणिसँग रहेर निर्भाना मै नै प्रशिक्षण गर्थे । टंकबहादुर कार्की सुनसरीकै भएपनि नियमित प्रशिक्षण भने त्यहाँ लिएनन् । शुक्र र निरजसँगै पूर्वका सम्भावना बोकेका खेलाडीलाई मणिले व्यक्तिगत तवरबाट पनि सहयोग गर्ने गरेका छन् ।

‘ मैले आफूले सम्भावना देखेको खेलाडीलाई गल्फमै लाग्न प्रेरित गर्न सहयोग गर्दै आएको छु । काठमाडौं जाने बेलामा होस् या प्रतियोगिताको सहभागिता जनाउन नै, आर्थिक र अन्य भौतिक रुपमा मैले सहयोग गरेको छु । आफ्नो क्षेत्रका खेलाडी गल्फमा आउँदा आफैंलाई फाइदा हुने हो,’ उनले भने ।

‘ मैले आफ्नो सुरुवाती दिन सम्झेर पनि उनीहरुलाई सहयोग गरेको छु । गल्फमा भर्खर प्रवेश गर्दा दर्ता शुल्क तिर्न पनि निकै कठिन हुने गर्दथ्यो । त्यसैले अहिले सम्भावना बोकेका खेलाडीलाई यसमा लाग्न समस्या नहोस् भनेर सहयोग गर्दै आएको छु । उनीहरुलाई खुलेर सहयोग माग्न भनेको छु, आफूले सकेको सहयोग त गर्ने पर्यो,’ मणिले थपे ।

यसपटक मणिको लागि इस्टर्न ओपन उपाधि जित्नुले विशेष त रहयो नै, एमेच्योर तर्फ पनि स्थानीय गल्फर निरजले उपाधि जिते । अन्तिम दिनको खेलअघि शीर्ष ३ खेलाडी नै धरानका थिए । शुक्रबहादुर राईले अन्तिम दिन कमजोर प्रदर्शन गरेपछि शिवराम श्रेष्ठ दोस्रो स्थानमा आएका थिए । मणिका अनुसार नियमित प्रशिक्षणका कारण नै यो सम्भव भएको बताउँछन् । उनले स्थानीय कोर्षमा नै प्रशिक्षण गर्न पाउँदा केहि फाइदा भने भएको स्वीकारे ।

उपाधि जित्ने क्रममा मणिले अन्तिम दुई दिन पटिङमा उत्कृष्ट प्रदर्शन गरे । प्राय सबै गल्फरको पट कमजोर हुँदा मणिले भने लामो दुरीबाट पनि पट छिराइरहेका थिए । अझ निकै दवाव रहने अन्तिम होलतिर उनको प्रदर्शन गजबको थियो । दोस्रो दिन १७ औं होलमा झन्डै ३० फिट टाढाबाट पट गरेका उनले अन्तिम दिन पछिल्लो चारै होलमा दर्शनीय प्रदर्शन गरे । दवावका बीच सोचेजस्तो प्रदर्शन भएकाले पनि उनले उक्त समय आफ्नो मनोभावनालाई रोक्न सकेनन् र मज्जाले खुसी व्यक्त गरे ।

गल्फमा उत्कृष्ट नतिजा हासिल गर्न मानसिक रुपमा चुस्त रहनुपर्ने उनको बुझाइ छ । पछिल्ला केहि वर्ष त्यसैकारण पनि उनले सफलता हात पार्न नसकेको अनुभव सुनाए । ‘ गल्फमा सफलता हात पार्न मानसिक रुपमा बलियो हुनुपर्छ । मेरो व्यक्तिगत अनुभवमा पनि पारिवारिक समस्याले गर्दा मैले राम्रोसँग ध्यान दिन सकेको थिइन । अहिले सबै ठिक भएकाले पनि मेरो नतिजा राम्रो आएको हो । अब आउने दिनमा पनि यसैलाई निरन्तरता दिने योजनामा छु,’ उनले थपे ।