काठमाडौं, साउन २९ गते ।
लिटिल एन्जल्स (एलए) स्कुलको आयोजनामा नवौं एलए/जेटीआई अन्तरविद्यालय जुनियर खुला टेनिस प्रतियोगिता बुधबारदेखि हुने भएको छ ।
प्रतियोगितामा विभिन्न ३४ विद्यालयका १११ ब्वाइज र ९३ गल्र्स गरी जम्मा २ सय ४ खेलाडीको सहभागिता रहने एलएका टेनिस प्रशिक्षक एवं प्रतियोगिता संयोजक रामेश्वर थापाले जनाएका छन् । जम्मा १२ स्वर्ण पदकका लागि प्रतिस्पर्धा हुनेछ । यु–८, यु–१०, यु–१२, यु–१४ र यु–१६ उमेरसमूहमा ब्वाइज/गल्र्स सिंगल्समा प्रतिस्पर्धा हुनेछ । त्यस्तै ब्वाइज/गल्र्सको डबल्स स्पर्धा पनि समावेश गरिएको छ ।
स्वर्णलाई १२, रजतलाई ६ र कांस्यलाई ३ अंक प्रदान गरी समग्रमा बेसी अंक प्राप्त गर्ने टिमलाई टिम च्याम्पियनको ट्रफी प्रदान गरिने छ । गत संस्करणमा एलए र सेन्ट जेभियर्स संयुक्त च्याम्पियन बनेका थिए । भूकम्पका कारण गत वर्ष प्रतियोगिता भएन । भदौ ८ गतेसम्म चल्ने प्रतियोगिताका खेलहरु हातीवनस्थित आयोजकको कोर्ट र त्रिपुरेश्वरस्थित राष्ट्रिय खेलकुद परिषद्को कोर्टमा खेलाइने छ ।
