चितवन (हाम्रो खेलकुद) – चितवन जिल्ला तेक्वान्दो कार्यसमितिले १३औं दक्षिण एसियाली खेलकुद (साग) मा पदकविजेता जिल्लावासी तेक्वान्दो खेलाडीलाई सम्मान गरेको छ ।

बिहीबार सौराहास्थित प्रशिक्षण केन्द्रमा सागमा स्वर्ण विजेता र कांस्य विजेता समान २-२ खेलाडीका साथै जिल्लाबाट उत्कृष्ट खेलाडी उत्पादन गर्न सफल प्रशिक्षकलाई सम्मानित गरेको हो । गत मंसिरमा सम्पन्न सागमा स्वर्णविजेताद्वय संगीता बस्याल र पार्वती गुरुङ तथा कांस्य विजेताद्वय शिशिर श्रेष्ठ र जितबहादुर बोट आफ्ना जिल्लाबाट सम्मानित भएका हुन् ।

कार्यसमितिले पार्वती र शिशिरलगायत कयौं राष्ट्रियस्तरका खेलाडी उत्पादन गर्न सफल प्रशिक्षक रोशन खानलाई पनि नगद १० हजारसहित सम्मानपत्र प्रदान गरेको थियो । १३औं सागमा पदक विजेता चारै खेलाडीलाई नगद १० हजार रुपैयाँसहित सम्मान गरिएको थियो ।

सोही अवसरमा चितवनका पत्रकारद्वय अनिल मल्ल ठकुरी र होमनाथ सापकोटालाई पनि जिल्लाको तेक्वान्दो खेल विकासमा योगदान पुर्याएबापत सम्मान गरिएको थियो । उक्त कार्यक्रममा जिल्ला समितिले ३४ सदस्यीय खेलाडी छनोट गरेको थियो ।

यसअघि भएको छनोट प्रतिस्पर्धामार्फत पुम्सेतर्फ चार महिला र पुरुष १० पुरुष तथा फाइटमा २० पुरुष खेलाडीको छनोट गरिएको कार्यसमितिका अध्यक्ष गोपाल श्रेष्ठले जानकारी दिए ।