एजेन्सी – इजिप्टियन फरवार्ड मोहम्मद सलाहको दुई गोल तथा एन्ड्रिउ रोबर्टसनले दुई असिस्ट दिएपछि मर्सिसाइड डर्वीमा लिभरपुलले इंग्लिस प्रिमियर लिगमा घरेलु टोली एभर्टनमाथि फराकिलो जित आत्मसात गरेको छ ।

लिभरपुलले एभर्टनलाई ४–१ को फराकिलो गोल अन्तरले पराजित गरेको हो । लिभरपुलको सहज जितमा जोर्डन हेन्डरसन र डिएगो जोटाले गोल थपे । घरेलु टोलीका लागि डेमाराई ग्रेले एक गोल गरे ।

गुडिसन पार्कमा बुधबार राति भएको खेलको नवौं मिनेटमा जोर्डन हेन्डरसनको गोलबाट लिभरपुलले खेलमा अग्रता लिएको थियो । उनले एन्ड्रिउ रोबर्टसनको पासमा गोल गरेका थिए ।

१९औं मिनेटमा मोहम्मद सलाहले गोल गर्दै लिभरपुलको अग्रता दोब्बर पारे । उनले जोर्डन हेन्डरसनको पासमा गोल गरेका थिए । ३८औं मिनेटमा डेमाराई ग्रेले गोल गर्दै एभर्टनलाई २–१ को अवस्थामा ल्याउँदै खेलमा फर्कने संकेत दिए ।

६४औं मिनेटमा मोहम्मद सलाहले व्यत्तिगत दोस्रो तथा टोलीका लागि तेस्रो गोल गरेपछ लिभरपुलले खेलमा ३–१ को अग्रता लिन सफल भयो । ७९औं मिनेटमा डिएगो जोटाले एन्ड्रिउ रोबर्टसनको पासमा गोल गर्दै लिभरपुलको जित पक्का गरे ।

यो जितसँगै लिभरपुलले शीष दुईमा रहेका चेल्सी र म्यानचेस्टर सिटीमाथि दवाव कायमै राखेको छ । लिभरपुलको १४ खेलबाट ३१ अंक छ । चेल्सीको ३३ तथा सिटीको ३२ अंक छ । पराजित एभर्टन १५ अंक जोडेर १४औं स्थानमा छ ।

अन्य नतिजा

साउथह्याम्टनविरुद्ध लेस्टर (२–२), वाट्फोर्डविरुद्ध चेल्सी (१–२), वेस्ट ह्यामविरुद्ध ब्राइटन (१–१), वल्भ्सविरुद्ध बर्नले (०–०) र एस्टन भिल्लाविरुद्ध म्यानचेस्टर सिटी (१–२)