काठमाडौं (हाम्रो खेलकुद)– फुटबल सामूहिक खेल भएकाले टोलीमा सबैको भूमिका महत्त्वपूर्ण हुन्छ । मैदान भित्र मात्र होइन, बाहिर हुनेको पनि उत्तिकै प्रभाव रहन्छ । फुटबल त्यस्तो रोमान्चक खेल हो जहाँ हर सेकेण्ड नयाँ मोड आउँन सक्छ ।

मैदान प्रवेश गर्नुअघिकै सबै योजनाले काम गर्छ नै भन्ने हुँदैन । नसोचेका अनेक घटना हुन सक्छन् । पोजिसन अनुसार मैदानभित्र ११ नै खेलाडीको आ आफ्नो जिम्मेवारी हुन्छ । त्यसमा गोलकिपरको भूमिका अन्य खेलाडीभन्दा बेग्लै हुन्छ । गोलकिपरका लागि टोलीमा धेरै विकल्प पनि हुँदैन । हरेक टोलीमा समग्रमा सामान्यता ३ गोलकिपर राखिन्छ भने हरेक खेलका लागि २ ।

कतार एअरवेज सहिद स्मारक ए डिभिजन लिगको १६ औं खेलको नतिजा गोलकिपरमा बढी निर्भर गर्यो भन्दा गलत हुने छैन । जारी लिगमै पहिलो ह्याट्रिक भएको उक्त खेलमा सातदोबाटो युथ क्लबले नेपाल एपिएफ एफसीलाई ४–१ ले हरायो । एपिएफमा पहिलो रोजाईका राजु योगी चोटग्रस्त छन् र उनी कम्तीमा ३ साता मैदान बाहिर रहने बताइएको छ । उनको अनुपस्थितिमा दोस्रो रोजाईका अमृत चौधरीले एपिएफको पोष्ट सम्हालेका थिए । तर, उनी पनि खुट्टामा लागेको चोटका कारण १९ औं मिनेटमै मैदान छाड्न बाध्य भए । उनलाई स्ट्रेचरमै बाहिर लागिएको थियो ।

अमृत घाइते भएपछि पोष्ट सम्हाल्न पुगे दिलकुमार लिम्बु । अमृत घाइते हुनु एपिएफका लागि दुर्भाग्य नै रह्यो । अमृतले मैदान छाड्दा गोलरहित बराबरीको अवस्थामा रहेको खेल अन्त्यसम्म पुग्दा एपिएफ फराकिलो अन्तरले पराजित हुन पुगेको थियो । सातदोबाटोका प्रशिक्षक मेघराज केसी र एपिएफका प्रशिक्षक कुमार थापा दुवैले गोलकिपरको कारण नतिजामा फरक परेको बताए ।

‘स्ट्राइकर लाइनमा हाम्रो समस्या अझै छ । समाधान भएको छैन । अवसर गुमेको छ । बरु नसोचेको गोल निस्केको छ’, सातदोबाटोका प्रशिक्षक केसीले भने, ‘एपिएफको पहिलो र दोस्रो रोजाईको गोलकिपर घाइते हुनु दुर्भाग्य हो । त्यसको एडभान्टेज हामीलाई भयो ।’

एपिएफका प्रशिक्षक थापाले भने, ‘किपरको कारण पनि गाह्रो भयो । दिलकुमारले पहिलो पटक खेलेको । राजु र दोस्रो किपर अमृत पनि घाइते । पहिलो पटक रंगशालामा खेलेको त्यसले पनि दबाब भयो । किपरको अप्सन खोज्दैछौं । विशेष भुमिका हो । किपर खोज्नु पर्ने भएको छ । राजु दुई तीन साता, अमृत अस्पताल लगेको छ । हेर्न बाँकी छ । किपरको अभाव नै भयो ।’

केसीले पानी परेर मैदानका कारण खेल चित्तबुझ्दो हुन नसकेको बताए । ‘हामीले सोचे जस्तो स्तरको खेल भएन । नतिजाका हिसाबले खुसी छु । एपिएफले पनि राम्रो खेल्यो’, उनले भने, ‘खाली उनीहरुले आक्रमण बुन्न सकेनन् । डिफेन्स , मिडफिल्डबाट बिल्डअप गरेर अट्याकीङ थर्ड सम्म पुर्याएका थिए । दुर्भाग्य पोल आक्रमण भएन । हामीले डिफेन्समा राम्रो गर्यौं ।’

केसीले अहिले पनि अंकतालिका हेर्ने बेला नभएको दोहोर्याएका छन् । ३ खेलमा २ जित र १ बराबरीका साथ शीर्षस्थानमा रहेको सातदोबाटोका प्रशिक्षक केसीले थपे, ‘भर्खर तीनवटा खेल सकियो । २० प्रतिशत सकियो । अहिले टेबल हेर्ने बेला भएको छैन । मिहिनेत गर्ने बेला हो । फलको लागि समयलाई छाडेको छु ।’

उनले हरेक खेल जित्नका लागि नै खेल्ने गरेको सुनाउँदै केसीले भने, ‘मेन्टालिटी नि जितको हुन्छ । खेल्दै जादा के हुन्छ त्यो अर्को पाटो हो । पहिलो खेलमा ३ अंक गुमायौं । १० खेल पनि जित्नकै लागि खेल्छौं ।’ केसीले रेफ्रीको प्रदर्शनको बारेमा प्रतिक्रिया दिन चाहेनन् ।

तर, एपिएफका प्रशिक्षक थापाले भने रेफ्री उमेश बिडारीका बारेमा बोले । उनले भने, ‘रेफ्रीको प्रदर्शन हाम्रो किपरकै जस्तो प्रदर्शन भयो । अलि अनुभवी चाहिन्छ । उहाँले बी डिभिजन पनि खेलाउनु भएको छ कि छैन मलाई थाहा छैन ।’

लगातार तेस्रो खेल हारेपछि टोलीमाथि दबाब झन बढेको जनाएका थापाले टोली रेलिगेसनमा भने नपर्ने दाबी गरे । अरु खेलमा हामी जित्छौं भन्ने विश्वास छ । अझै ३० अंकको खेल बाँकी छ । मलाई विश्वास छ हामी १५ अंक जोड्नेछौं ।

खेल हारेर दबाब हुन एक ठाँउमा भए पनि हरेक खेलमा सुधार भने भइरहेको थापाले बताए । ‘खेलमा सुधार हुँदै आएको छ । मार्जिन भए पनि । राम्रो लिनुपर्छ । ३ प्वाइन्ट त गयो गयो’, उनले भने, ‘३ खेल हार्नु भनेको दबाब हो । कम ब्याक गर्छ जस्तो लाग्यो । पहिलो गोल अफसाइड जस्तो लाग्यो । बढी नै दबाब भयो ।’