काठमाडौं (हाम्रो खेलकुद) – संकटा क्लब र मनाङ मस्र्याङ्दी क्लबले कतार एअरवेज सहिद स्मारक ए डिभिजन लिगमा शनिबार १–१ को बराबरी खेल्दा टचलाइनमा २ पोखरेली प्रशिक्षक रहेका थिए । जन्म घर तनँहु भएपनि कर्म भूमिका पोखरा बनाएका विष्णु गुरुङले संकटाको कमान सम्हालिरहेका छन् । मनाङले भने यसपटक राजेन्द्र तामाङको प्रशिक्षणमा लिग खेलिरहेको छ ।

पहिलो पटक ए डिभिजन लिगको क्लबलाई प्रशिक्षण दिइरहेका गुरुङको टोली संकटा लिगमा अपराजित छ । ३ खेलमा उनको टोलीले २ बराबरी र १ जितका साथ ५ अंक जोडेको छ र टोली तालिकाको तेस्रो स्थानमा छ । शनिबार खेलमा दुई पटक अग्रता लिएपनि अन्तिम समयमा सम्हालिन नसक्दा संकटा जितको नजिक पुगेर बराबरीमा चित्त बुझाउनु परेको थियो ।

संकटा, थ्री स्टारका पूर्व खेलाडी समेत रहेका गुरुङले सक्रिय खेल जीवन छाडेको दुई वर्ष मात्र भएको छ । उनले तामाङको प्रशिक्षणमा थ्री स्टारबाट २०७२ को राष्ट्रिय लिग उपाधि खेलाडीको भूमिकामा जितेका थिए ।

यता तामाङको नेतृत्वमा मनाङ ३ खेलमा अपराजित छ । २ जित र १ बराबरी गरेको टोली ७ अंकका साथ दोस्रो स्थानमा छ ।

अन्तिम समयमा ध्यानाकर्षण गुमाउँदा गोल खानु परेपनि टोलीको प्रदर्शनबाट भने गुरुङले खुसी व्यक्त गरे । ‘प्रदर्शनबाट म खुसी छु । हरेक टिमसँग हामी नयाँ प्लानका साथ आएका छौं । मनाङ बलियो टोली हो त्यसैले हामी सचेत थियौं’, उनले भने, ‘अन्त्यमा ध्यान केन्द्रित गर्न नसक्दा खोल खायौं । हातमा आएको अंक गुमायौं । तर पनि प्रर्दशनबाट खुसी छ ।’

मनाङका पूर्व खेलाडी समेत रहेका तामाङलाई राम्रो प्रशिक्षक बताउँदै गुरुङले भने, ‘मैले उहाँबाट धेरै सिकेको छु । उहाँमात्र होइन अन्य प्रशिक्षक किरण श्रेष्ठ, बाल दाई (बाल गोपाल महर्जन), टेक्निकल डाइरक्टर ग्यारी फिलिप्स र राष्ट्रिय टोलीका अब्दुल्लाह अलमुताइरीबाट पनि सिकरहेको छु । अझ धेरै सिक्नुछ ।’

तामाङले पनि गुरुङको तारिफ गरे । ‘उसले राम्रो गरिरहेको छ । कोर्स गरेर तयारीका साथ आएका छन् । आज हामीलाई गाह्रो पारे ।’ तामाङले आक्रमणमा अझैपनि सोचेजस्तो प्रदर्शन नभएको औंल्याए । ‘हाम्रो आक्रमणमा सोचेजस्तो भएको छैन । आज पनि विदेशी सोमिडेको स्थानमा अर्का खेलाडी (निशान लिम्बु) ले राम्रो खेलेका कारण अवसर दियौं । सोमिडे केहि घाइते पनि छन् त्यसैले फिजियोको सल्लाहमा सुरुवात नगराएका हौं ।’

उनले संकटाले मनाङभन्दा राम्रो प्रदर्शन गरेको बताए । उनले थपे, ‘क्वालिटी प्लेयर तुलानात्मक रुपमा हामीसँग थियो । तर टिममा उनीहरु राम्रो देखिए । खेल्ने शैली फरक थियो । हामी भन्दा बेटर थियो ।’

खेल जीवनमा रहँदा रहँदै केहि समय रोजगारीका सिलसिलामा विदेश पुगेका गुरुङ पुनः स्वदेश फर्केर खेलाडीका रुपमा सक्रिय भएका थिए । केहि वर्षअघि उनी प्रशिक्षणमा सामेल भएका थिए । सी, बी हुँदै यसै बर्ष गुरुङले एएफसी ए लाइसेन्स प्राप्त गरेका थिए । फुटबलमा फर्केयता आफू रमाइरहेको उल्लेख गर्दै उनले भने, ‘एकदम रमाइरहेको छु । पहिला छाडेर गएको थिए । अहिले फर्केर फुटबलमा रामाइरहेको छु। रमाउने क्रममा धेरै कुरा सिक्छु । गल्ति नि गर्छु होला । आगामी दिनमा राम्रो गर्ने कोशिस गर्छु ।’