एजेन्सी – स्पेनिस महारथी रियल म्याड्रिडले यूईएफए च्याम्पियन्स लिग अन्तर्गत अन्तिम १६ को खेलमा इंग्लिस क्लब चेल्सी वा फ्रान्सेली क्लब पेरिस सेन्ट जर्मेन (पिएसजी) को सामना गर्नुपर्ने सम्भावना बढेको छ ।

गत सिजन मात्र सेमिफाइनलमा भिडेका चेल्सी र रियल म्याड्रिडले यसपटक राउन्ड अफ १६ मै भिड्नुपर्ने सम्भावना रहेको छ । रियल समूह विजेताको रुपमा अघि बढेपनि चेल्सी युभेन्टसभन्दा पछि रहेर अर्को चरणमा पुगेको थियो । समूह उपविजेताको रुपमा पिएसजी पनि रियलको सम्भावित प्रतिद्वन्द्वी बन्न सक्छ ।

च्याम्पियन्स लिग समूह चरण अन्तर्गत इटालियन क्लब एटलान्टा र स्पेनको भिल्लारियलको खेल अझै बाँकी छ । उक्त खेलको नतिजाले पनि रियलको सम्भावित प्रतिद्वन्द्वी को हुन्छ भन्नेमा केहि असर पर्नेछ छ । भिल्लारियल छनोट भएको अवस्थामा रियलले चेल्सी वा पिएसजीसँग खेल्नुपर्ने सम्भावना बढी हुन्छ ।

समग्रमा रियलले अन्तिम १६ मा पिएसजी, चेल्सी, बेन्फिका, साल्जबर्ग वा स्पोर्टिङ लिस्बन मध्य एकसँग खेल्नुपर्ने देखिन्छ । इन्टर मिलानसँग समूह चरणमा खेलेको कारण रियलले इटालियन च्याम्पियनसँग यसै चरणमा खेल्नु पर्दैन । त्यस्तै समूह उपविजेताको रुपमा अघि बढेको एटलेटिको म्याड्रिड पनि रियलसँग पर्ने छैन । एटलान्टा अघि बढेको अवस्थामा रियल सम्भावित प्रतिद्वन्द्वी रहनेछ ।

अन्तिम १६ को ड्र सोमबार हुनेछ ।