काठमाडौं (हाम्रो खेलकुद)– दशरथ रंगशालामा जेठमा भएको पहिलो फ्रेन्चाइज लिग नेपाल सुपर लिग (एनएसएल) को उपाधि काठमाडौं रेजर्सले जितेको थियो । काठमाडौं जित्नुमा दुई विदेशी खेलाडी स्टेफन समिर विनोङ र मेसुके ओलुमोउको भूमिका महत्वपूर्ण थियो । ८ गोल गरेका मेसुके एनएसएलको उत्कृष्ट फरवार्ड नै घोषित भएका थिए ।

यी दुईको त्यसबेलाको प्रदर्शन देखेर न्यूरोड टिम (एनआरटी) ले कतार एअरवेज सहिद स्मारक ए डिभिजन लिगका लागि स्टेफन र मेसुकेलाई अनुबन्ध गरेको थियो । तर, दुवै विदेशीले जारी लिगमा भने खासै प्रभाव जमाउन सकेका छैनन् । चौथो खेलमा आएर स्टेफेनले गोलको खाता खोल्दा एनआरटीले जारी लिगमा पहिलो जित हासिल गर्यो ।

१–० को एनआरटीको त्यो जितले नवप्रवेशी सातदोबाटोको जितको अपराजित यात्रा टुंगिएको छ । दोस्रो हाफ सुरु भएको १५ औं सेकेन्डमा नै सातदोबाटोका करण रावतको मिस पासलाई मेसुकेले नियन्त्रणमा लिँदै दिएको पासमा स्टेफनले गोल गरेका थिए । दुई विदेशी चलेको दिन एनआरटीले जारी लिगमा पहिलो जित दर्ता गरेको थियो ।

यद्दपी उनीको प्रदर्शनबाट एनआरटीका मुख्य प्रशिक्षक सन्तुष्ट हुन सकेका छैनन् । ‘स्टेफन चेटग्रस्त छन् । उनी राम्ररी खेल्न सकेका छैनन्,’ उनले भने, ‘मेसुके पनि खेल्न सकेका छैनन् । टोटेल अफ छन् । एनएसएलमा त्यस्तो राम्रो गरेको खेलाडी अहिले नचल्दा गाह्रो त हुन्छ नै ।’

पहिलो पटक ३ अंक जोड्दा खुसी भएका शाक्य प्रशिक्षकको नाताले टोलीको प्रदर्शनबाट भने अझै सन्तुष्ट हुन सकेका छैनन् । यसै सिजन एनआरटीमा आबद्ध भएका रञ्जन विष्टलाई उनले दोस्रो हाफमा उतार्ने गरेका छन् । सातदोबाटोविरुद्ध भने उनले योजना भएपनि उतार्न सकेनन् । ‘रञ्जनलाई इन गर्ने प्लान थियो । तर, एरिक विष्ट घाइते भएपछि हामीले उनलाई पठाएनौं । परिस्थिति अनुसार योजना बदल्न पर्ने हुन्छ,’ उनले भने, ‘रञ्जन राम्रो खेलाडी हो । त्यसैले हामीले लिएका हौं । तर पनि उनी ९० मिनेट खेल्न फिट छैनन् जस्तो लाग्छ ।’

लिगमा पहिलो हारपछि सातदोबाटोका मुख्य प्रशिक्षक मेघराज केसीले भने अघिल्ला तीन खेलमा जस्तो गति एनआरटीविरुद्ध कायम गर्न नसकेको बताएका छन् । ‘अघिल्ला खेलहरुमा भन्दा आज पेस स्लो थियो । मिस पासेस पनि ज्यादा भयो,’ उनले भने, ‘एनआरटीले निकै राम्रो खेल्यो । भन्नुपर्दा एनआरटीले मौका बनाए अनुसार स्कोर भएन । बराबरी हुने अवस्था पनि थियो । मिस गर्यौं । समग्रमा हामीले अझै मेहनत गर्न बाँकी छ ।’