पहिलो हाफ – मछिन्द्र र संकटा बराबर

काठमाडौं (हाम्रो खेलकुद) – शीर्षस्थानमा रहेको मछिन्द्र फुटबल क्लब र संकटा क्लबले कतार एअरवेज सहिद स्मारक ‘ए’ डिभिजन लिगको पहिलो हाफमा बराबरी खेलेका छन् । प्रतिस्पर्धात्मक खेलको पहिलो हाफ गोलरहित बराबरीमा टुंगिएको हो ।

त्रिपुरेश्वरस्थित दशरथ रंगशालामा शुक्रबार भएको खेलको पहिलो मिनेटमा फोडे फोफाना चुक्दा संकटाले अग्रता लिने सुवर्ण मौका गुमायो । जय गुरुङको पासमा फोडे फोफानाको वान भर्सेस वानको प्रहारलाई गोलरक्षक विशाल श्रेष्ठले अघि बढ्दै बचाएका थिए ।

२१औं मिनेटमा सुनिल बलका कर्नरलाई गोलरक्षक राजा बाबु थापाले पञ्च गर्दै बचाए । त्यसमै विशाल राईको प्रहारले पोस्टको दिशा लिन सकेन । ३०औं मिनेटमा रन्जित धिमालको क्रस सिधै गोलरक्षक राजा बाबु थापाको हातमा पुग्यो । ३६औं मिनेटमा फोडे फोफानाको प्रहार पहिलो बार च्याप्दै बाहिरियो ।

४०औं मिनेटमा फोडे फोफानाले मैदानको मध्य भागबाट दुई डिफेन्डरलाई बिट गर्दै दिएको क्रसलाई आन्द्रस नियाले क्लियर गर्दै मछिन्द्रको संकट टारे । पहिलो हाफको इन्ज्युरी समयको थप गरिएको तेस्रो मिनेटमा लक्ष्मण रुचालको कर्नरमा निरज बस्नेतको हेडर पोस्ट नजिकैबाट बाहिरिदा संकटाले अग्रता लिन सकेन । मछिन्द्रले भने संकटाको पोस्टमा खासै आक्रमण बुन्न सकेको छैन ।