एजेन्सी – सुपरस्टार भेट्रान फरवार्ड क्रिस्टियानो रोनाल्डोले एक गोल तथा अर्को गोलको लागि असिस्ट दिएपछि म्यानचेस्टर युनाइटेडले इंग्लिस प्रिमियर लिगमा सहज जित निकालेको छ ।

घरेलु मैदानमा युनाइटेडलाई बर्नलीलाई ३–१ ले पराजित गरेको हो । युनाइटेडको जितमा रोनाल्डोसँगै स्कट म्याक टोमिनेले गोल गरे । एक गोल उपहार पाएको थियो । बर्नलेका लागि आरोन लेनननले एक गोल गरे । सबै चार गोल पहिलो हाफमा नै भएको थियो ।

ओल्ड ट्राफोर्डमा बिहीबार राति भएको खेलको आठौं मिनेटमा स्कट म्याक टोमिनेको गोलबाट घरेलु टोली युनाइटेडले सुरुवाती अग्रता लिन सफल भयो । रोनाल्डोले आफैले प्रहार गर्नुपर्ने बल स्कटलाई छाडिदिदा उनले सुन्दर फिनिस गरेका थिए ।

२७औं मिनेटमा जेडान सान्चोको प्रहार विन मिलाई लाग्दै गोलगमा परिणत हुदा युनाइटेडले खेलमा २–० को अग्रता लिन सफल भयो । ३५औं मिनेटमा रोनाल्डोले गोल गर्दै युनाइटेडलाई ३–० ले अघि बढाए । स्कट म्याट टोमिनेको प्रहार क्रसबारमा लागेर फर्कदा रिवाउन्डमा रोनाल्डोले खाली पोस्टमा गोल गरेका थिए ।

३८औं मिनेटमा आरोन लेनननले गोल गर्दै खेललाई पहिलो हाफमा ३–१ को स्थितिमा ल्याए । दोस्रो हाफमा दुवै टोलीबाट थप गोल निस्कन नसक्दा पहिलो हाफको नतिजा नै युनाइटेडको जितमा पर्याप्त बन्यो ।

जितसँगै युनाइटेड १८ खेलबाट ३१ अंक जोडेर पाँचौ स्थानमा उक्लिएको छ । समान ३१ अंक नै रहेपनि वेस्ट ह्याम गोल अन्तरमा अघि छ । वेस्टह्यामले एक खेल बढी खेलेको छ । एक खेल कम खेलेको टोटेनहमको ३० अंक छ । पराजित बर्नले ११ अंक जोडेर रेलिगेसन जोनको १८औं स्थानमा रहेको छ ।