काठमाडौं (हाम्रो खेलकुद) – सव्सिच्युट फरवार्ड विजय भुजेलले इन्ज्युरी समयको अन्तिम मिनेटमा गरेको गोलमा रुस्लान थ्री स्टार क्लबले कतार एअरवेज सहिद स्मारक ‘ए’ डिभिजन लिगमा संकटा क्लबलाई पराजित गरेको छ ।

थ्री स्टारले लिगमा अपराजित रहेको संकटालाई १–० ले स्तब्ध पारेको हो । निशान खड्काको क्रसलाई गोलरक्षक राजाबाबु थापाले पञ्च गर्दै बचाएपनि रिवाउन्डमा राफायल रिमगागोले गरेको प्रहारमा विजय भुजेलले निर्णायक टच दिएका थिए ।

९०औं मिनेटमा सन्जोक राईको स्थानमा मैदान छिरेका विजयले इन्ज्युरी समयको थप गरिएको सातौ मिनेटमा गोल गर्न सफल भएका थिए । प्रतिस्पर्धात्मक बनेको खेलमा दुवै टोलीले गोलका केही अवसर सिर्जना गरेपनि थ्री स्टारलेले जितको लागि अन्तिम समय नै कुर्नुपरेको थियो । थ्री स्टार चोटका कारण आफ्ना मुख्य पाँच खेलाडीविनै मैदान उत्रिएको थियो ।

जितसँगै थ्री स्टारले संकटालाई नै पराजित गर्दै चौथो स्थानमा उक्लदै उपाधिको सम्भावना जीवितै राखेको छ । थ्री स्टारको ९ खेलबाट १६ अंक पुगेको छ । शीर्षस्थानमा रहेको मछिन्द्रको १९ अंक छ । पराजित संकटा १४ अंक जोडेर पाँचौ स्थानमा झरेको छ ।

दिनकै अर्काे खेलमा त्रिभुवन आर्मी क्लबले रेलिगेसन जोनमा रहेको फ्रेन्ड्स क्लबलाई ३–१ ले पराजित गरेको छ । आर्मीको जितमा जगजित श्रेष्ठ, दिनेश हेन्जन र सुमन अर्यालले गोल गरे । फ्रेन्ड्सका जमल फ्रान्सिसले एक गोल फर्काए ।

जितसँगै आर्मी ९ खेलबाट १७ अंक जोडेर तेस्रो स्थानमा उक्लिएको छ । फ्रेन्ड्स ३ अंक जोडेर पुछारमा छ ।