एजेन्सी – साविक विजेता क्याटलान क्लब बार्सिलोना स्पेनिस कोपा डेल रेको प्रि–क्वाटरफाइनलबाट बाहिरिएको छ । गत वर्षको उपविजेता एथलेटिको बिल्वाओसँग अतिरिक्त समयमा ३–२ ले स्तब्ध हुँदै बार्सिलोना अन्तिम १६ बाटै घर फर्कनुपरेको हो ।

सान मामेस बारिया बिल्वाओमा बिहीबार राति भएको खेलमा बिल्वाओको क्वाटरफाइनल यात्रामा इकर मुनिएनले दुई तथा इनिगो मार्टिनेजले एक गोल गरे । बार्सिलोनाका फेरान टोरेस र पेड्रीले गोल गरेपनि हार टार्न सकेनन् ।

खेलको दोस्रो मिनेटमा नै इकर मुनिएनको गोलबाट घरेलु टोली बिल्वाओले १–० को अग्रता लिन सफल भएको थियो । उनले निको विलियम्सको पासमा गोल गरेका थिए ।

२०औं मिनेटमा फेरान टोरेसले गोल गर्दै खेललाई १–१ गोलको बराबरीमा ल्याए । यसै विन्टरमा इंग्लिस क्लब म्यानचेस्टर सिटीबाट बार्सिलोना आएका उनले कप्तान सर्जियो बुस्क्वेट्सको पासमा क्लबका लागि डेब्यु गोल गर्न सफल भएका थिए । उनले बार्सिलोनाको लागि दोस्रो खेल खेल्दा गोल गर्न सफल भएका हुन् ।

८६औं मिनेटमा इनिगो मार्टिनेजले गोल गर्दै बिल्वाओलाई जिततर्फ अग्रसर गराए । तर, इन्ज्युरी समयको थप गरिएको तेस्रो मिनेटमा पेड्रीले ड्यानी आल्भेसको पासमा गोल गर्दै खेललाई बराबरीमा ल्याउँदै बार्सिलोनाको सम्भावना जीवितै राखे ।

त्यसपछि अतिरिक्त समयमा लम्बिएको खेलको १०५औं मिनेटमा इकर मुनिएनले पेनाल्टीमा गोल गर्दै बार्सिलोनालाई स्तब्ध पारे । निको विलियम्सले गरेको क्रसलाई पेनाल्टी बक्समा जोर्डी अल्वाले हातले बललाई छुन पुगेपछि रेफ्रीले बिल्वाओलाई पेनाल्टी प्रदान गरेका थिए । जसमा मुनिएन चुकेनन् । त्यसपछि थप गोल निस्कन नसक्दा बिल्वाओ विजयी हुन सफल भयो ।

यो सिजन बार्सिलोना तीन उपाधिबाट बञ्चित बनिसकेको छ । गत डिसेम्वरमा बोका जुनियर्ससँग म्याराडोना कपको फाइनल गुमाएको बार्सिलोनाले यसै महिना रियल म्याड्रिडसँग पराजित हुँदै स्पेनिस सुपर कपको उपाधि पनि गुमाइसकेको छ । बार्सिलोनाको अब युरोपा लिग र स्पेनिस ला लिगामा मात्रै उपाधि जित्ने सम्भावना छ , ला लिगामा पनि बार्सिलोना रियलभन्दा १७ अंकले पछि छ ।