एजेन्सी – स्पेनिस कोपा डेल रेको क्वाटरफाइनलमा ला लिगाका दुई टोली रियल म्याड्रिड र एथलेटिक बिल्वाओबीच प्रतिस्पर्धा हुँदैछ । खेल बिल्वाओको मैदानमा नेपाली समयअनुसार शुक्रबार बिहान २:१५ बजे हुनेछ ।

यो सिजन रियल र बिल्वाओबीच डिसेम्बरयता चौथो पटक प्रतिस्पर्धा हुन लागेको हो । यसअघिको सबै तीन भेटमा रियल विजयी भएको छ । स्पेनिस ला लिगामा रियलले १–० र २–१ को जित निकाल्दा स्पेनिस सुपर कपको फाइनलमा २–० को जित निकालेको थियो ।

रियल पछिल्लो चार खेलमा बिल्वाओसँग अपराजित छ । सबै चारै खेलमा विजयी भएको छ । रियल सोही जितलाई निरन्तरता दिँदै घरेलु टोलीलाई पराजित गर्दै सेमिफाइनलमा पुग्ने दाउमा हुनेछ । मुख्य फरवार्ड करिम बेन्जेमाले चोटका कारण तथा अर्का युवा फरवार्ड भिनिसियस जुनियरले थकानका कारण खेल्ने सम्भावना न्यून छ । मार्सेलो प्रतिबन्धका कारण टोलीमा हुनेछैनन् ।

यस्तो अवस्थामा इडेन हाजार्ड, लुका जोभिक र मार्काे एसेन्सियोले रियलको अग्रपङ्ति सम्हाल्ने सम्भावना छ । टोनी क्रुस, लुका मोड्रिच, इडुआर्डाे कामाभिंगा, डेभिड अलाबा, ड्यानी कार्भाजल, नाचो फर्नान्डेस, लुकास भास्क्वेज, फेडे भाल्भेर्डे, इडर मिलिसाओ र गोलरक्षक थिवाउट कोर्टुवा रहेका छन् ।

थकानका कारण क्यासमिरोले पनि पहिलो रोजाईमा खेल्ने सम्भावना कम छ । भिनिसियस, क्यासमिरो, फेडे भाल्भेर्डे र रोड्रिगो अन्तर्राष्ट्रिय ड्युटीका कारण ढिला गरी टोलीको प्रशिक्षणमा जोडिएका छन् ।

यता, बिल्वाओ पनि रियलसँगको लगातारको हारको श्रृंखलालाई तोड्दै सेमिफाइनल पुग्ने लक्ष्यमा हुनेछ । गत वर्ष १५ जनवरी २०२१ म २–१ ले पराजित गरेयता चार खेलमा रियललाई हराउन सकेको छैन । टोलीसँग राउल गार्सिया, इनाकी विलियम्स, इकर मुनिएन, ड्यानी गार्सिया, निको विलियम्स, इनिगो मार्टिनेज, यरे अल्भारेज र युनाई सिमोन टोलीमा रहेका छन् ।

अर्काे सेमिफाइनलमा रियल सोसिडाड र रियल बेटिसबीच प्रतिस्पर्धा हुँदैछ । खेल राति १२:४५ बजे हुनेछ । यसअघि रियल भालेकानोले रियल मलोर्कालाई १–० ले तथा भ्यालेन्सियाले क्याडिजलाई २–१ ले पराजित गर्दै सेमिफाइनलमा स्थान पक्का गरिसकेको छ ।