काठमाडौं (हाम्रो खेलकुद) – नेपाली राष्ट्रिय फुटबल टोलीका कप्तान किरण चेम्जोङ आवद्ध माल्दिभ्सको क्लब माजियाले स्पेनिस फरवार्ड ताना डोमीन्ग्वेजलाई अनुबन्धन गरेको छ ।

माजियाले शनिबार सामाजिक संजालमार्फत स्पेनिस ला लिगामा लास पाल्मासका लागि ८ वर्ष खेलेका ३१ वर्षीय फरवार्ड अनुबन्ध गरेको जानकारी दिएको छ । ताना डोमीन्ग्वेजले लास पाल्मासको सिनियर टोलीका लागि झन्डै १ सय ५० खेल खेलेका थिए । उनले यसक्रममा १६ गोल गरे ।

तानाले सन् २०१६/१७ सिजनमा लास पाल्मासका लागि रियल म्याड्रिडविरुद्ध गोल समेत गरेका थिए । उनकै गोलमा टोलीले १-१ को बराबरी गरेको थियो । तानाले उत्कृष्ट प्रदर्शन गरेको उक्त खेलमा लास पाल्मासले ३-१ को अग्रता लिएरपनि अन्तिम समयमा ३-३ को बराबरी खेलेको थियो । क्रिस्टियानो रोनाल्डोले ८६ औं मिनेटमा पेनाल्टी र ८९ औं मिनेटमा गोल गरेपछि खेल ३-३ को बराबरी भएको थियो ।

सन् २०१२ देखि २०२० सम्म लास पाल्मासमा रहेका तानाले सन् २०१९ मा लोनमा चीनको झेजियाङ ग्रिनटाउनबाट खेलेका थिए । सन् २०२१ मा अल्बासेटेमा अनुबन्धित उनी त्यसयता भने फ्री एजेन्ट रहेका थिए । उनले यस सिजनका लागि माजियामा अनुबन्धन गरिएको अनुमान छ ।

किरणको टोली माजियाले यस सिजनको एएफसी कपको समूह चरणमा स्थान पक्का गरिसकेको छ । नेपालको मछिन्द्र भने प्लेअफको तीन प्रतिद्वन्द्वीलाई हराएपछि मात्र समूह चरणमा पुग्नेछ ।

क्लबले यसै साता प्रशिक्षकको भूमिकामा मिओद्राग जेसिचलाई अनुबन्ध गरेको थियो । गत साता प्रेसिडेन्ट कपको फाइनलमा क्लब भ्यालेन्सियासँग पराजित भएपछि क्लबले प्रशिक्षक मोहमद सियाजलाई पदमुक्त गरेको थियो । क्लबले फिटनेस प्रशिक्षक गोरान गुजिजनलाई पनि अनुबन्ध गरेको छ ।